Deputetja demokrate Albana Vokshi thotë se sherri mes deputetëve Flamur Noka dhe Agron Shehaj në Kuvend ishte një përplasje e stisur prej kryetares së Kuvendit, Elisa Spiropali.
Ajo shprehet se fakti që deputetëve të opozitës nuk u jepet fjala në Kuvend nga Spiropali, i çon ata në përplasje apo konflikte.
Nëse zbatohet rregullorja asgjë nuk do ndodhi
“Ishte një përplasje e stisur prej kryetares së Kuvendit.
Secili deputet bazuar në rregulloren e Kuvendit ka të drejtën e procedurës, ka të drejtën e replikës.
Gjë që po mohohet në mënyrë të vazhdueshme nga kryetarja e Kuvendit.
Po sot paradite unë kam kërkuar fjalën për procedurë për të folur për njërin prej projektligjeve që ishte futur në rendin e ditës në shklelje me rregulloren.
E kam kërkuar fjalën disa herë në të gjitha format dhe kryetarja e Kuvendit që siç duket ka mbetur peng i konflikteve të brendshme dhe luftës së brendshme në grupin parlamentar të PS nuk na e dha fjalën as mua dhe as kryetares së Komisionit për çështjet e Shëndetësisë, zonjës Zheni Gjergji.
Gjithashtu edhe zoti Agron Shehaj kërkoi fjalën për replikë sepse iu përmend emri nga zv kryeministrja Balluku gjë që iu mohua nga kryetarja e Kuvendit.
Pra janë provokime të cilat më tej çojnë në zvarritje dhe në përplasje apo konflikte.
Nëse zbatohet rregullorja asgjë nuk do ndodhi.“- tha Vokshi në Ora News.
Kujtojmë se Flamur Noka shtyu dhunshëm nga foltorja deputetin Agron Shehaj, i cili e mbante të bllokuar prej disa orësh, pasi kryeparlamentarja Elisa Spiropali e përjashtoi nga seanca pas tensioneve për refuzimin e interpelancës me ministren Belinda Balluku. Por, pasi Agron Shehaj u largua nga seanca, ai vazhdoi të qëndronte para foltores, duke qenë “live” në rrjetet sociale me telefonin e tij.
Në këtë moment ka ndodhur dhe një përplasje e dytë fizike mes tyre, ku siç shihet edhe në videon e mëposhtme, Flamur Noka i ka marrë dhunshëm telefonin dhe ia ka disa metra drejt derës së sallës.
