Sasia e parave që njerëzit dërgojnë jashtë Bashkimit Europian po rritet me shpejtësi. Që nga viti 2018, ajo u hodh me 20 miliardë euro, duke arritur një shifër rekord prej 50 miliardë euro në vitin 2023, thotë Eurostat.
Kjo ndryshon ndjeshëm nga paratë e marra nga banorët në BE, të cilat arritën në “vetëm” 14 miliardë euro vitin e kaluar dhe mbetën të qëndrueshme që nga viti 2018.
Të gjitha vendet me bilanc pozitiv që do të thotë se morën më shumë para sesa dërguan ishin në Europën Lindore, ku gati gjysma ishin anëtarë kandidatë në BE.
Serbia kryeson listën, e ndjekur nga Rumania, Kroacia, Bosnja dhe Hercegovina, Bullgaria, Kosova dhe Shqipëria.
Franca ka bilancin më negativ të pagesave, -15.7 miliardë euro, e ndjekur nga Spanja (-8 miliardë euro) dhe Gjermania (-7.4 miliardë euro).
Në mbarë botën, SHBA-ja është vendi më i madh burimor për dërgesat e emigrantëve.
Banka Botërore i ka përcaktuar ato si një “burim thelbësor” parash, veçanërisht për vendet me të ardhura të ulëta dhe të mesme.
Në vitin 2023, Amerika Latine dhe Karaibet ishin rajoni me rritjen më të lartë në flukset e remitancave (7.7%).
Shumat e Azisë Jugore gjithashtu u rritën ndjeshëm (+5.2%), “kryesisht të nxitura nga flukset e fuqishme në Indi, ndërsa rajoni i Azisë Lindore dhe Paqësorit përjetoi një rritje prej 1.8%, të mbështetur nga remitancat në Filipine”.
Nga ana tjetër, remitancat në Afrikën Sub-Sahariane ranë me 0.3%. Megjithatë, këto flukse vazhdojnë të nxisin vendet që përballen me pasigurinë ushqimore dhe çështjet e borxhit, thotë organizata.
