E gjendur në pjesën e sipërme të fshatit Vuno, në kishën e Shën Mëhillit ka nisur zbatimi i projektit restaurues. Kisha është shpallur monument kulture i kategorisë së parë në vitin 2015, ndërsa ky projekt synon rikthimin e saj në një gjendje funksionale si dhe mbrojtjen e vlerave historike dhe arkitektonike.
E ndërtuar me gurë të lidhur me llaç gëlqereje, ajo i përket tipit të kishave me një nef, me apsidë të rrumbullakët dhe afreske të vitit 1783. Deri më tani nuk kishte pasur ndërhyrje restauruese.
Pikat kryesore të projektit restaurues janë çati e re me tjegulla vendi; restaurim dhe konsolidim strukturor i muraturave prej guri; pastrim dhe fugatim i murit; restaurim i kornizave dhe dyshemesë me gurë; ringritje e kambanares dhe ndërtim trotuari me kalldrëm; F.V. dyer dhe dritare druri.
