Lëvizja “Shqipëria Bëhet” e Adriatik Lapajt ka zhvilluar një takim me fermerët dhe blegtorët e fshatit Mursi në Konispol.
Gjatë takimit është prezantuar programi ekonomik i kësaj force politike me fokus në zhvillimin e bujqësisë dhe blegtorisë.
Programi parashikon një sërë masash konkrete, duke filluar nga subvencionimi i prodhimit për kilogram. Një rëndësi të veçantë i është kushtuar kontrollit të cilësisë, duke propozuar vendosjen nën mbikëqyrje të plotë të subjekteve që tregtojnë fara, fidanë, pesticide dhe plehra kimike.
Një nga pikat më të rëndësishme të programit është krijimi i Bankës Kombëtare Agrare me kapital tërësisht shtetëror. Kjo bankë do të ofrojë kredi me interesa të ulëta për fermerët, blegtorët, peshkatarët dhe bletërritësit, duke synuar t’i japë fund problemit të kredive me interesa të larta nga institucionet e mikrokredive.
Programi përfshin gjithashtu masa për mbrojtjen nga importet e paligjshme dhe krijimin e Qendrës Kombëtare për certifikimin e tokave bujqësore.
Postimi i “Shqipëria Bëhet”:
Me fermerët, blegtorët, peshkatarët dhe bletërritësit e fshatit Mursi, në Konispol.
Prezantuam disa nga pikat e programit tonë:
1. Subvencionim i prodhimit për kilogram;
2. Vendosja nën kontroll total të subjekteve që shesin/importojnë/prodhojnë fara dhe fidanë;
3. Vendosja në kontroll të plotë e subjekteve që importojnë dhe shesin pesticide dhe plehra kimike;
4. Hapja e Bankës Kombëtare Agrare me kapital 100% shtetëror, e cila do të financojë me kredi të buta fermerët/blegtorët/peshkatarët/bletërritësit duke u dhënë fund kredive me interesa vrastare nga fajdexhinjtë e mikrokredive;
5. Mbrojtje nga importet kontrabandë;
6. Krijimi i Qendrës Kombëtare të çertifikimit të tokave bujqësore;
7. Stimulimi i investimeve në ndërtimin e linjave të përpunimit të produketeve bujqësore.
Do vijmë kudo!
