Erdhën festat e fundvitit, së bashku me to edhe atmosfera e ngrohtë e krijuar nëpërmjet zbukurimeve në qendrat kryesore të qyteteve. Por asnjë vit nuk është i njëjtë. Pasi bashkitë zgjedhin të shpenzojnë më shumë nga buxheti i tyre aktual. Por ka nga ato që tregohen edhe më dorështrënguar.
Duke shpenzuar pak më shumë para për zbukurime të reja, të marra me qira apo dhe duke riparuar të vjetrat, bashkitë në vend kanë harxhuar më shumë këtë vit nga paratë e taksapaguesve shqiptar për dekorin e fundvitit.
Afro 100 milionë lekë të reja kanë shpenzuar deri më tani vetëm 16 bashki në vend nga 61 që janë gjithsej. 26% e bashkive janë treguar transparente në publikimin e tenderave përkatëse për shpenzimet e kryera.
Në varësi edhe të numrit të popullsisë banuese, Tirana mbizotëron në dekorin më të shtrenjtë duke i dhënë kështu një tjetër pamje kryeqytetit në krahasim me vite më parë.
E stolisur me atmosferën festive, duke nisur nga instalacionet e vendosura në tokë por edhe në bulevardet kryesore, e deri te pemët gjigande dhe fishekzjarrët, Bashkia Tiranë për kryeqytetin ka shpenzuar afro 25 milionë lekë.
Sa të bukura edhe të shtrenjta. Shumica e bashkive kryesisht ato të mëdha kanë shpenzuar mbi 5 milionë lekë. Pas Tiranës, nisur nga Berati, Shkodra, Korca, Fieri etj., bashkitë nuk kanë ngurruar të blejnë apo marrin me qira edhe zbukurime me çmime të “kripura”.
Korça është treguar më dorëlëshuar nga bashkitë e tjera.(foto tenderi) Për 3 instalacione në formë bredhi dhe shandan ka shpenzuar 3.7 milionë lekë ose rreth 37 mijë euro. Nuk mungojnë edhe tenderët e tjerë për zbukurimin e qytetit.
Bashki të tjera që kanë lëshuar dorën në shpenzimet për dekorin e fundivitit janë dhe Berati me 14 milionë lekë, Korça 10 milionë lekë, Fieri 8 milionë lekë. Ndërsa bashkitë që shpenzojnë më pak apo përdorin dhe dekoret e viteve më parë janë edhe ato të cilat kanë sipërfaqe dhe numër të vogël popullsie.
Ndërsa Vlora nuk lë pas as riparimin e dekorit të viteve më parë. Në varësi të numrit të banorëve duke nisur nga Pusteci me 1 mijë e 800 banorë e deri tek Tirana në 598 mijë bashkitë kanë shpenzuar nga 300 mijë lekë deri në 25 milionë lekë./A2 CNN
