Kristian Shpendi është bërë emri më i lakuar në Itali, pasi paraqitjet e tij në dy vitet e fundit me Çezenën, fillimisht në Serinë C e së fundmi në Serinë B, e kanë kthyer në objektiv të merkatos së shumë klubeve të njohura.
Por në momentin kur përflitet për kalimin e tij në një nga klubet e rëndësishme të Serisë A, klubi i Çezenës ka bërë të ditur se ka rinovuar marrëveshjen që ka me futbollistin, duke e zgjatur atë deri në vitin 2028.
“Çezena njofton se i ka zgjatur kontratën sulmuesit Kristian Shpendi deri më 30 qershor 2028.
Me mbërritjen në sektorin e të rinjve të Çezenës në verën e vitit 2019, sulmuesi i lindur në vitin 2003 fillimisht luajti në radhët e ekipeve U-17 dhe Primavera përpara se të bënte debutimin e tij në ekipin e parë në fillim të sezonit 2021/2022.
Në mesin e protagonistëve të fitores së kampionatit të Serisë C 2023/2024, me fanellën e Çezenës, ai ka shënuar 35 gola në 80 paraqitje gjithsej.
E gjithë familja e Çezenës i uron Kristianit fat në vazhdimin e aventurës së tij me bardhezinjtë”, shkruhet në njoftimin e klubit.
