Sipërfaqja e liqenit të Kukësit, pas reshjeve të shiut të rëna gjatë ditëve të fundit, ka filluar të mbulohet me mbeturina urbane, ndotja po përsëritet shpesh në basenin e ujëmbledhës të hidrocentralit më të madh në vend, atë të Fierzës.
Një pamje e tillë përsëritet sa herë që ka reshje shiu me vërshime të ujërave në verilindje të vendit dhe në Kosovë.
Siç dihet, fryrja e përrenjve e lumenjve që derdhen mbi Drin merr me vete shumë mbetje urbane që hidhen në mënyrë të papërgjeshme nga banorët këndej e andej kufirit me Kosovën, duke sjellë jo pak shqetësime për turistët dhe peshkatarët.
