Nick Cannon, prezantuesi i “The Masked Singer”, ka zbuluar së fundmi se është diagnostikuar klinikisht me çrregullim të personalitetit narcisist. Në një intervistë për revistën People, ai theksoi se po punon për të përmirësuar veten.
“Ende nuk e kuptoj plotësisht, por gjithmonë kam dashur të testohesha për këtë çrregullim”, citohet të ketë thënë ai. Gjatë një eventi bamirësie për Ditën e Falënderimeve në Los Angeles, Cannon shtoi: “Ka shumë etiketime, por për mua është e rëndësishme ta pranoj dhe të them se po shërohem, më ndihmoni”.
Çrregullimi i personalitetit narcisist përfshin ndjenja të ekzagjeruara drejt vetes dhe kërkimin e vazhdueshëm për vëmendje, sipas Klinikës Mayo. Ky çrregullim shpesh trajtohet me terapi dhe mund të ndikojë negativisht në marrëdhënie, punë dhe çështje financiare.
Në podcast-in e tij Counsel Culture, Cannon diskutoi për simptomat e narcisizmit, duke përmendur se ai identifikohet me shumicën prej tyre, përveç mungesës së empatisë dhe zemërimit. “E kam hulumtuar dhe tani e kuptoj më mirë këtë term”, tha ai.
Pavarësisht sfidave, Cannon theksoi rëndësinë e terapisë dhe angazhimin për të qenë pranë 12 fëmijëve të tij gjatë Ditës së Falënderimeve.
