Gjykata e Tiranës dha sot masën e sigurisë ‘arrest me burg’ për 14-vjeçarin, i cili akuzohet se vrau me thikë shokun e tij të shkollës, Martin Cani.
Seanca e vlerësimit të masës së sigurisë u mbajt në një spital privat të kryeqytetit, ku i mituri po merr mjekim për shkak të plagës që ka marrë në dorë prej ditës kur ndodhi vrasja.
I mituri nuk është treguar bashkëpunues duke thënë se nuk mbante mend çfarë ka ndodhur, ndërsa nuk ka treguar as se ku e ka fshehur thikën e krimit.
Gjyqtarja e gatshme, përfaqësuesi i akuzës dhe avokati shkuan atje për të mbajtur seancën.
Ndryshe nga referimi i policisë për ngjarjen, ku e akuzoi të miturin për vrasje me dashje, organi i akuzës e ka riklasifikuar krimin duke kërkuar në gjykatë masën arrest me burg për akuzën e “vrasjes në rrethana cilësuese ndaj të miturit “, si edhe “mbajtje pa leje të armëve të ftohta”.
