Salvador Kaçaj, ish-futbollist i Kombëtares Shqiptare, ka bërë me përgjegjësi në mënyrë të drejtpërdrejtë trajnerin Silvinho për dështimin në këtë edicion të Ligës së kombeve.
Duke folur në Syri Tv, ai ka hyrë në analiza taktike dhe teknike duke shpjeguar ku gaboi trajneri me aktivizimin apo mosaktivizimin e lojtarëve.
“Nuk mund të them që rezultatet janë të zakonshme, janë të pazakonta. Problemet nuk janë të rastësishme, janë të kahershme. Problemet janë që me ardhjen e Sylvinhos.
Të dalësh në vendin e katërt me ekipe të të njëjtit nivel është turp kombëtare. Është gjynah edhe në aspektin njerëzor për të gjithë ata tifozë, rreth 25 mijë, që vijnë në stadium dhe blejnë biletat më të shtrenjta në Evopë. Është një pabarazi me kombëtaret e tjera. Në Gjermani gjen bileta me 20 euro, 30 apo 50 euro.
Analiza e ekipit kombëtar bëhet në tre komponentë: komponenti taktik, tekniko-taktik dhe organizativ. Në vitin 2024 është i palejueshëm ky lloj patriotizmi që po luhet me stemën kuqezi, me flamurin kombëtar. Të jesh patriot në çdo lloj kohe është nder dhe krenari, por jo të përdoret ekipi kombëtar, të banalizohet deri në këtë pikë saqë shpeshherë mua më vjen turp, siç ishte rasti i Gjermanisë, ku unë isha vetë prezent.
Shumëkush nuk i kupton. Ne që jemi sportistë, unë jam ndër të fundit, nuk shkon. Këtu është një ngërç i madh te trajneri. Po të shohim ndeshjen e fundit, është shumë e dhimbshme, të bësh ato gabime të trajnerit. Vetëm t’i bësh me qëllim, por mua nuk më shkon mendja që trajneri dëshiron të humbasë. Unë them që i ka nga paaftësia, është një trajner shumë i paaftë dhe i papërshtatshëm dhe për këtë ka dhënë prova.
Provat i dha në kampionatin Evropian. Një gazetar i njohur spanjoll e pyeti: kaq ekip i madh jeni ju që nuk keni grumbulluar dy lojtarë e kampionatit spanjoll, Uzunin dhe Baren?
Uzunin nuk e mori fare në Evropian, kurse mbrëmë e mbajti në stol, nuk e kishte në formacionin titullar. Përjashtoi në Evropin Cikalleshin dhe mbrëmë na duhej pikërisht Cikalleshi. E përjashtoi kur ishte në kulmin e formës. Një futbollist me shumë përvojë që na duhej mbrëmë. U vëmë shumë shpejt shkelmin lojtarëve tanë që kanë derdhur djersë dhe gjak dhe kanë kontribuuar për të shkuar në Evropian.
La në stol Bajramin dhe bëri një rreshtim taktik të turpshëm. Thotë që ne rreshtohemi 4-3-3, ndërkohë që mbrëmë ishte 4-5-1. Ndeshja ishte për liri a vdekje, pra ose do të vdisnim nga ana sportive ose do të mbijetonim. Ne luajtëm me një sulmues, ndërkohë që duhej të luanim me dy. Uzuni dhe Bajrami duhet të ishin që në fillim. Bajrami është lojtari më i mirë që kemi për momentin, po çorodit kundërshtarët te Glasgow Rangers.
Kjo u pa në pjesën e dytë, ku u fton në fushë Uzuni, Bajrami dhe Hoxha ndryshoi tabloja. Ky është faji i pastër i trajnerit.” ka thënë ai.
