Gjykata e Lezhës ka pezulluar gjykimin ndaj Edmond Përdodës, i akuzuar për vrasjen rapsodit Kol Murrani dhe mikut të tij Preng Simoni, ngjarje kjo e ndohur më 27 prill të vitit 2020, pranë shtëpive të tyre të vjetra në fshatin Lalm i Vjetër, të Njësisë Administrative të Kolshit.
42-vjeçari Edmond Përdoda akuzohet për veprat penale “Vrasje në rrethana të tjera cilësuese”, kryer në bashkëpunim dhe “Mbajta pa leje e armëve, armëve shpërthyese dhe municionit”, teksa tashmë gjykata ka vendosur për të caktimin e masës mjekësore “Mjekim i detyruar në një institucion mjekësor (psikiatrik).
Pezullimi i gjykimit për Përdoden erdhi pas raportit mjeko-ligjor që e nxori me probleme të thekesuara të shëndetit mendor, ndërsa është vendosur edhe shurja e mases së sigurisë “arrest në burg” të vendosur ndaj tij
Edmond Përdoda u arrestua nga forcat RENEA në shkurt të vitit 2022, dy vite pas krimit të dyfishte, teksa dyshohet se ka ndihmuar vëllain e tij, Aleksandër Përdoda, i dënuar me burgim të përjetshëm si autor i vrasjes së dyfishtë.
Kol Murrani dhe Preng Simoni banonin në periferi të qytetit të Lezhës dhe ditën e ngjarjes, më 27 prill 2020, kishin dalë herët në mëngjes me motor, për të shkuar te shtëpitë e vjetra që kishin në fshatin Lalm i Vjetër.
Pasi kanëishin ngarkuar një thes me jonxhë, dy burrat do të ktheheshin në Lezhë, por rrugës dyshohet se janë qëlluar befasisht me armë zjarri nga Aleksandër Përdoda.
Ngjarja mendohet të ketë ndodhur pas një konflikti pronësie mes Preng Simonit dhe Aleksander Përdodës, i cili kishte ndodhur 8 muaj para vrasjes.
Në dëshminë e tij, vetë i pandehuri e pranoi konfliktin asokohe, por çështja sipas tij ishte zgjidhur. Nga analizimi që u është bërë qelizave telefonike, Përdoda ka qenë afër vendit të krimit.
