Një shpërthim me lëndë eksplozivi është regjistruar mbrëmjen e të mërkurës në Gjykatën e Lartë të kryeqytetit brazilian Brasilia, por si pasojë e shpërthimit ka humbur jetën autori që po i vendoste tritolin institucionit të drejtësisë.
BBC News raporton se ai u gjet pa shenja jete jashtë ndërtesës pak pasi dy shpërthime të fuqishme tronditën zonën. Kalimtarët në vendin e ngjarjes thanë se e kishin parë atë duke hedhur eksploziv përpara shpërthimit. Sipas zyrtarëve, askush tjetër nuk është lënduar në inicident.
Zona u mbyll përkohësisht dhe një robot për asgjësimin e bombave u përdor për të kontrolluar trupin e viktimës. Policia thotë se ka identifikuar një kohëmatës që mund të jetë i lidhur me pajisje të tjera.
“Roboti i Policisë Ushtarake po kontrollon trupin e individit që kreu sulmin dhe u identifikua një kohëmatës, dhe ndoshta është i lidhur me eksplozivë të tjerë. Tashmë janë identifikuar eksplozivë të tjerë rreth trupit. Duhet të jemi shumë të kujdesshëm për të kryer këtë kërkim dhe nëse është e nevojshme, t’i shpërthejmë këto eksplozivë në vend për të parandaluar që ato të shkaktojnë një reaksion zinxhir” – tha zëdhënësi i policisë Maj Raphael van der Broocke.
Avokati i përgjithshëm i vendit, Jorge Messias, dënoi sulmin e qëllimshëm dhe u zotua për një hetim të plotë mbi shpërthimet.
“Unë dënoj fuqishëm sulmet kundër Gjykatës së Lartë dhe dhomës së ulët. Ne duhet të dimë motivin pas sulmeve dhe të rivendosim paqen dhe sigurinë sa më shpejt të jetë e mundur”, tha ai në një deklaratë të postuar për X
Zëvendësguvernatorja e Brasilia, Celina Leao u tha gazetarëve se shpërthimi kishte ndodhur pasi një burrë iu afrua hyrjes së gjykatës dhe nuk arriti të hynte. Ajo rekomandoi që parlamenti të mbetet i mbyllur të enjten ndërsa hetimet vazhdojnë.
“Mund të ketë qenë një ujk i vetmuar, si të tjerët që kemi parë nëpër botë. Ne po e konsiderojmë si një vetëvrasje sepse kishte vetëm një viktimë. Por hetimet do të tregojnë nëse ka qenë vërtet kështu”, u tha ajo gazetarëve, sipas agjencisë së lajmeve AP.
Shpërthimet vijnë vetëm një javë përpara se presidenti kinez Xi Jinping të vizitojë kryeqytetin, pas një udhëtimi në samitin e G20 në Rio de Zhaneiro.
Vitin e kaluar, sheshi ishte skena e trazirave masive, pasi mbështetësit e ish-presidentit Jair Bolsonaro plaçkitën ndërtesat në një përpjekje për të parandaluar humbjen e tij zgjedhore nga presidenti Lula.
