Klubi brazilian Fluminense ka njoftuar zgjidhjen e kontratës së Marcelos vendim që erdhi pas përplasjes së ish-lojtarit të Realit të Madridit me trajnerin Mano Menezes gjatë ndeshjes ndaj Grêmios.
Në deklaratën e klubit pohohet se “lidhjet institucionale dhe emocionale midis Fluminenses dhe Marcelo mbeten të paprekura”, ashtu si edhe emri i lojtarit, që u përjetësua së fundmi në stadiumin e qendrës stërvitore Xerém.
Në minutën e 89-të të takimit, me rezultatin 2-1 në favor të Fluminenses, Mano Menezes po përgatitej të bënte një zëvendësim të dyfishtë. Teksa trajneri jepte udhëzime, Marcelo komentoi diçka që nuk i pëlqeu trajnerit, i cili ka reaguar menjëherë, duke u përballur me lojtarin dhe madje e ka shtyrë drejt stolit.
Në konferencën e mëpasshme për shtyp, Menezes shmangu zbulimin e frazës së saktë që i kishte thënë Marcelos.
Sikur të mos mjaftonte kjo përplasje, Fluminense humbi dy pikë pas golit të barazimit të Grêmios në minutën e 99-të.
