Janë përcjellë për në banesën e fundit personat e vrarë në atentatin e djeshëm në Shkodër.
Në foto shihet arkivoli i Arlind Bushatit, i cili shoqërohet për në varreza, i rrethuar nga një numër i madh qytetarësh.
Në të njëjtën kohë, në banesën e fundit janë përcjellë edhe dy viktimat e tjera të kësaj ngjarjeje tragjike, Hamza Lici dhe kalimtarja Flutura Basha.
Ndryshe nga dy familjet e tjera, Bushati dhe Basha, familja e të shumë kërkuarit të drejtësisë, Ibrahim Lici nuk kanë hapur dyert e mortit për 23-vjeçarin. Familjarët e Hamza Licit kanë vendosur që të mos presin njerëz për ngushëllime në banesën e tyre, teksa nuk dihet pse e kanë marrë këtë vendim.
Për ngjarjen e rëndë janë shoqëruar për marrje në pyetje 20 persona, mes tyre dhe Safet Bajri, familja e të cilit ka një histori të gjatë konflikti me familjen Lici. Në deklaratën e tij për policinë, Bajri ka pohuar se gjatë kohës së ngjarjes ndodhej në shtëpi me familjen dhe kërkoi që kamerat e sigurisë të përdoren për të vërtetuar alibinë e tij.
Atentati ndodhi në zonën e Dobracit, në rrugën Shkodër-Koplik, ku rreth orës 15:50 persona të paidentifikuar hapën zjarr ndaj një automjeti me targa kroate ku ndodheshin Hamza Lici dhe Arlind Bushati. Hamza Lici, vëllai i Ibrahim Licit, u vra në vend, ndërsa Arlind Bushati, djali i ish-kandidatit të PD-së për kryebashkiak, Xhemal Bushatit, ndërroi jetë disa orë pas ngjarjes në spitalin e Shkodrës. Kalimtarja Flutura Basha, e cila po udhëtonte me motor bashkë me bashkëshortin e saj, Bashkim Basha, gjithashtu u vra në sulm, ndërsa bashkëshorti i saj ndodhet në gjendje të rëndë në spital.
