Një adoleshente me origjinë shqiptare, rreth 13 vjeç, humbi jetën tragjikisht mëngjesin e të premtes në Piacenza të Italisë.
Ajo ra nga çatia e një pallati 7 katësh në rrethana ende të paqarta. Vajza përfundoi nga kati i 7-të në tarracën e një apartamenti në katin e katërt, por ekipi i shpëtimit nuk mundi të bënte asgjë për të.
Mediat italiane raportojnë se autoritetet e drejtësisë kanë nisur hetimet për vrasje me dashje, teksa të hënën pritet të dalin dhe rezultatet e autopsisë së viktimës.
Në lidhje me hetimet për ngjarjen u shoqërua në Polici edhe i dashuri i viktimës, një 15-vjeçar shqiptar, i cili ishte i pranishëm në momentin e hedhjes së vajzës. Pasi u mor në pyetje për një kohë të gjatë, ku kishte deklaruar se e mitura u hodh vetë, ai u la i lirë nga autoritetet. Ndërkohë për familjarët e viktimës, ai është i dyshuari kryesor.
“E hodhi poshtë, ajo nuk ishte e çmendur apo e dëshpëruar, ajo ishte një tjetër viktimë e dhunës. Ishte i fiksuar pas saj, u përpoq në çdo mënyrë ta hiqte qafe atë.”, shkruan e motra e viktimës në një shpërthim publik në rrjetet sociale, duke publikuar edhe disa screenshot nga bisedat me motrën e saj, të cilat nxjerrin në pah disa nga sjelljet e djalit të konsideruara si problematike.
Aktualisht po zhvillohen hetime intensive për të kuptuar se çfarë ka ndodhur përmes hetimeve teknike në vendngjarje, dëhmive të personave që besohet se janë informuar për faktet dhe sekuestrimin e telefonit të viktimës.
Miqtë e viktimës pohojnë se ajo nuk kishte ndonjë shenjë që do kryente vetëvrasje” dhe se ajo po planifikonte një udhëtim në Paris me nënën e saj.
