Kryeministri britanik Keir Starmer lavdëroi të hënën përpjekjet e Italisë për të gjetur zgjidhje për çështjen e imigracionit të paligjshëm, duke thënë se dyja vendet duhet të ndajnë më shumë informacione, strategji dhe të bashkëpunojnë për “të shkatërruar” bandat e trafikimit me qeniet njerëzore.
Në një konferencë të përbashkët shtypi, zoti Starmer tha se diskutimet e tij me Kryeministren italiane Giorgia Meloni kishin ndihmuar në formësimin e qasjes së Britanisë ndaj imigrimit të paligjshëm, që është shkak gjithnjë e më i madh zemërimi për britanikët, të cilët thonë se numrat e lartë të imigrantëve po përkeqësojnë kualitetin e shërbimeve publike.
Takimi i tij me zonjën Meloni, që erdhi pas vizitave në Berlin, Paris dhe Dublin si pjesë të përpjekjeve për të përmirësuar marrëdhëniet me Bashkimin Evropian, sipas ekipit të tij do të përmirësojë bashkërendimin për t’u përballur me çështjen e imigrimit.
“Sot diskutuam për një sfidë të përbashkët dhe diskutuam se si të përballemi me të? (Përgjigja është) përmes bashkëpunimit, ndarjes së të dhënave, informacionit të zbulimit e kështu me radhë”, tha ai në konferencën me gazetarë.
Zoti Starmer tha se ishte “shumë i interesuar” për marrëveshjen e Italisë me Shqipërinë, e cila do të shqyrtojë disa nga kërkesat për azil të emigrantëve të shpëtuar në det që përpiqen të arrijnë tokën italiane, por se ai tha që marrëveshja ende duhet të fillojë të zbatohet dhe se qeveria e tij do të presë të shohë rezultatet e saj.
Ai lavdëroi punën e kryeministres Meloni për të parandaluar migrantët para se të fillonin udhëtimin e tyre, që siç tha ai, ka ndikuar në rënien prej 60 për qind të ardhjeve të parregullta përmes detit në Itali./ VOA
