Ka nisur seanca plenare që parashikohet të ketë debat mes PS-PD, ndërkohë që një nga pikat kryesore të rendit të ditës, është interpelanca e thirrur nga kreu i grupit parlamentar të Partisë Demokratike Gazment Bardhi, me kryeministrin Edi Rama, në lidhje me mbetjet toksike.
Kreu i grupit Parlamentar të PD, Gazment Bardhi, ka folur në Kuvend ndryshimin e ligjit për Gardën e Republikës
Bardhi kërkon të ngrihet një komision etike për të vërtetuar si u sponsorizua ligji. Ai shton më tej se ligjet me porosi janë kthyer normalitet për këtë mazhorancë.
“10 shtator 2024 ministri i Brendshëm njoftoi zgjedhjen e drejtorit të Gradës së Republikës me garë. Në fakt në mars 2023 kur miratonit ndryshmit për Gardën e Republikës ju kam thënë që është investim për të zgjedhur një njeri që vjen nga jashtë sistemit. E votuat me urdhër të Ramës, dhe gjashtë muaj më vonë u zgjodh emri që jua thamë edhe ne, për të cilin u ndryshua ligji. Nuk ka akt më korruptiv se të detyrosh deputetët e mazhorancës të votojnë për interesat e një personi.
Ngrini një komision etike për të vërtetuar si u sponsorizua ligji. Ligjet me porosi janë kthyer normalitet për këtë mazhorancë.”– tha Bardhi.
Kujtojmë se në rendin e ditës parashikohet edhe një interpelancë me zv. kryeministren Belinda Balluku, e kërkuar nga një grup deputetësh të PD, për ndërtimin e segmentit Thumanë-Kashar dhe aksin “Rruga e Kombit”, në lidhje me bllokimin e aksesit të qytetarëve që banojnë në zonat pranë, si dhe shqyrtimi i mandatit të Olta Xhaçkës, për dërgimin në Gjykatën Kushtetuese të mocionit të 1/10 së deputetëve për papajtueshmërinë e mandatit.
