Ministri i Jashtëm, Igli Hasani ka qenë i pranishëm në takimin e mbajtur sot në Tiranë nga organizata “Gratë për Afganistanin” për gratë dhe vajzat afgane mbi gjendjen e vështirë, që ato po kalojnë nën regjimin taleban.
Gjatë fjalës së tij, Hasani i ka siguruar gratë dhe vajzat afgane se do të kenë siguri të plotë në Shqipëri, pasi Qeveria do të angazhohet me të gjitha mjetet bazë të nevojshme për këtë gjë.
“Vendi ynë ka qenë i zëshëm në vlerësimin e guximit, qëndrueshmërisë dhe forcës së grave afgane, të cilat vazhdojnë të luftojnë për të drejtat e tyre themelore dhe me guxim denoncojnë brutalitetin e regjimit. Strehimi i Afganëve në arrati nga tmerri i rikthimit të talebanëve në pushtet nuk përbën vetëm një betim të thellë nderi, të lidhur me traditën unike të mikpritjes së Shqipërisë, por ai dëshmon qartë vendosmërinë e qeverisë shqiptare për të siguruar çdo afgan që hyn në territorin tonë, veçanërisht gratë dhe vajzat, me të gjitha mjetet bazë të nevojshme për të gëzuar dinjitet njerëzor dhe siguri të plotë në Shqipëri”, tha ministri për Evropën dhe Punët e Jashtme, Igli Hasani.
Vlen të theksohet fakti se Shqipëria strehoi një numër të konsiderueshëm afganësh, që u larguan nga luftimet në Afganistan. Ata erdhën në Shqipëri me shpresën se më pas do të shpërnguleshin në SHBA, por deri më tani ky premtim i amerikanëve nuk është mbajtur dhe ata kanë mbetur në vendin tonë.
