Shqipëria U-17 fitoi ndeshjen e parë miqësore me Luksemburgun U-17 me rezultatin 3-1. Në stadiumin e Vorës kuqezinjtë dominuan takimin dhe golat i shënuan Kris Gecaj dhe Gabriel Kulla (2).
Kjo ishte edhe ndeshja e parë me ekipin Kombëtar U-17 për trajnerin e ri Andrea Tedesco, që debuton me fitore në stolin kuqezi.
Pas disa rasteve të mira për shënim, goli i parë erdhi në minutën e 28-të. Pas një harkimi nga këndorja, kapiteni Kris Gecaj zhbllokoi rezultatin pasi goditi saktë me kokë.
Minutat në vazhdim folën sërish për kuqezinjtë, teksa pa u mbyllur pjesa e parë sulmuesi Gabriel Kulla realizoi golin e dytë.
Pjesa e parë mbyllet me rezultatin 2-0, ndërsa në fraksionin e dytë trajneri Andrea Tedesco kreu disa zëvendësime, duke u dhënë mundësinë pothuajse të gjithë lojtarëve të grumbulluar të tregojnë vlerat e tyre në fushë.
Skuadra e Luksemburgut shkurtoi rezultatin në minutën e 63-të. Megjithatë kuqezinjtë nuk e ulën ritmin dhe në minutën e 83-të vuloson fitoren.
Gabriel Kulla shënoi golin e tretë me një 11-metërsh dhe të dytin personal në këtë takim.
Në fund sfida e parë miqësore u mbyll me fitoren e Shqipërisë 3-1.
