Ministria e Mbrojtjes ka publikuar raportin ditor sa i përket situatës së zjarreve në vendin tonë.
Pavarësisht reshjeve të shiut të filluara prej mesditës së djeshme, bëhet me dije se 3 vatra zjarri janë ende aktive, ndërsa janë shuar 28 vatra të tjera.
Vatrat e zjarrit aktive janë në Arrë të bashkisë së Kukësit, ajo në Fushë Lugje të Mirditës dhe vatra në Buçaj të Shkodrës, por theksohet se janë të izoluara dhe pa rrezik përhapjeje
“Pas shumë javësh betejë me zjarret që përfshinë shumë zona të territorit të vendit tonë, sot situata paraqitet më e qetë. Gjatë 24 orëve të fundit, nga 31 vatra zjarri të raportuara, 28 janë shuar plotësisht, ndërsa vetëm 3 vatra mbeten ende aktive.
Aktualisht, vatra në Arrën të bashkisë së Kukësit, ajo në Fushë Lugje të Mirditës dhe vatra në Buçaj të Shkodrës janë të izoluara pa rrezik përhapjeje dhe po monitorohen për të shmangur çdo mundësi riaktivizimi.” – thuhet në njoftimin e ministrisë.
