Dita e djeshme ishte një ditë pushimi, por Presidenti i Republikës, Bajram Begaj u paraqit që në mëngjes në zyrën e tij për shkak të ndryshimeve në Qeveri të bëra nga kryeministri Edi Rama. Gjithsesi, kreu i shtetit nuk i dekretoi, pavarësisht se kreu i qeverisë ia çoi në tavolinë menjëherë pas përfundimit të Kongresit të PS-së.
Pritet ditën e sotme një dekret i Begajt që më pas, në orën 18:00 do të mblidhet Kuvendi në një seancë parlamentare të posaçme për të miratuar ndryshimet në Qeveri, por edhe ato në parlament. Për të miratuar ndryshimet në Qeveri do të duhen 71 vota që më pas ata të marrin detyrën.
Më konkretisht në Kongresin e PS-së, Rama propozoi emërimin e Elisa Spiropalit për të zëvendësuar Lindita Nikollën në postin e kryetares së Kuvendit, pasi kjo e fundit dha dorëheqjen për arsye shëndetësore.
Ndërkohë, Rama ka larguar edhe Ermonela Felajn nga posti i nënkryetares së Kuvendit, dhe në vend të saj ka emëruar Bledar Çuçin, i cili mbante postin e kreut të grupit parlamentar të PS-së. Në vend të Çuçit, në postin e kreut të grupit parlamentar të PS-së ka emëruar Niko Peleshin, duke e larguar nga posti i Ministrit të Mbrojtjes.
Gjithashtu, një ndryshim surprizë në qeveri ishte dhe ai i Taulant Ballës. Ky i fundit është larguar nga posti i Ministrit të Brendshëm, duke e emëruar në postin e ministrit të Shtetit për Marrëdhëniet me Parlamentin, në vend të Elisa Spiropalit. Rama ka larguar edhe Ervin Meten nga posti i ministrit të Financave, duke emëruar në vend të tij Petrit Malajn. Ndërkohë, Ervin Hoxha është emëruar ministër i Brendshëm, ndërsa Pirro Vengu është emëruar ministër i Mbrojtjes.
Të tre ministrat e rinj, Petrit Malaj, Ervin Hoxha dhe Pirro Vëngu aktualisht mbajnë poste drejtorësh në institucione në varësi të ministres së Infrastrukturë dhe Energjitikës, Belinda Ballukut. Ervin Hoxha mban postin e drejtorit të Përgjithshëm të Inspektoriatit Kombëtar të Mbrojtjes së Territorit, Petrit Malaj mban postin e kreut të Agjencisë Kombëtare të Burimeve Natyrore dhe Pirro Vëngu mban postin e kreu të Autoritetit Portual të Durrësit.
Ndërkohë, nuk dihet nëse do të marr pjesë opozita në seancën e sotme në Kuvend, teksa kreu i grupit parlamentar të PD-së, Gazment Bardhi i ka njoftuar kolegët e tij, teksa thotë se Begaj i ka bërë dekretimet me urgjencë.
“Kolegë, Presidenti si roje e godinës së Presidencës ka bërë dekretimin e ministrave të rinj me urgjencë dhe pa asnjë verifikim. Administrata e Kuvendit më njofton që sot në orën 18:00 do të ketë seancë të jashtëzakonshme parlamentare për emërimet në qeveri. Njoftimi zyrtar do ju përcillet edhe me email.”, – shprehet kreu i deputetëve demokratë.
Ndërkohë, ditën e sotme do të mblidhet edhe Kryesia e Partisë Socialiste për të diskutuar ndryshimet në Qeveri, por edhe e propozuar ditën e djeshme në Kongres, por edhe për përgatitjet për zgjedhjet e vitit 2025.
