E diela e 21 korrikut ishte dita me temperaturën më të lartë të regjistruar ndonjëherë në Tokë.
Sipas të dhënave të publikuara nga Copernicus, programi i Bashkimit Evropian për vëzhgimin e Tokës, të dielën temperatura mesatare në tokë ka qenë 17,09 gradë celsius, pak më e lartë se korrikun e vitit të kaluar kur u regjistrua temperatura 17,08 gradë celsius.
Copernicus monitoron temperaturat në Tokë që prej vitit të largët 1940. Muaji korrik është ai më i nxehti në Tokë, ndërsa rekordi i së dielës vjen në një moment ku shumë vende në planet janë duke u përballur me një valë të nxehti ekstrem. Rreth 100 qytete në SHBA po përjetojnë fillimin e verës më të nxehtë në histori, po ashtu edhe shumë shtete në Europën Jugore janë duke u përballur me temperatura ekstreme.
“Tani jemi në një territor vërtet të paeksploruar dhe ndërsa klima vazhdon të ngrohet, ne do të shohim rekorde të reja që do të thyhen në muajt dhe vitet e ardhshme“, tha Carlo Buontempo, drejtor i Copernicus.
Sipas analizës së bërë nga Copernicus, shkruan CNN, rritja e papritur e temperaturave globale, është e lidhur me temperaturat jo normale me të cilat është duke u përballur Antarktida gjatë kësaj kohe.
Ngrohja e shpejtë e kontinentit të akullt po alarmon shkencëtarët, pasi ky rajon i globit mund të sjellë një rritje katastrofike të nivelit të detit.
