Jugu i Shqipërisë është një perlë që nëna natyrë ia ka falur vendit tonë, por që qeveria Rama e ka lënë në mëshirë të fatit. Pas çmimeve të kripura të çadrave e shezlloneve dhe faturave të larta të restoranteve, pushuesit duhet të notojnë në ujëra të ndotura të cilat rrezikojnë edhe ti infektojnë. Faturës përfundimtare duhet ti shtosh edhe shpenzimet e spitalit.
Por kush do të përgjigjet për këtë? Qeveria Rama vijon të heshtë dhe të mos bëjë asgjë për parandalimin e ndotjes së ujërave të kristalta të jugut.
Kemi inspektoriat mjedisi, por në vend se të parandalojë dhe ndëshkojë për fekalet në det, ia ka futur një gjumi letargjik që vetëm po ndodhi ndonjë hata e madhe mund ta zgjojë.
Pse paguhen dhjetëra institucione dhe miliona euro kur nuk bëjnë asgjë për të siguruar mjedisin dhe jetët e shqiptarëve e turistëve me të cilët krenohet qeveria Rama.
Rama dhe mediat e tij shkruajnë çdo mëngjes se jugu, veçanërisht Ksamili i cilësuar si “Maldivet e Europës”, është pushtuar nga turistët, por askush nuk shkruan se ata që vijnë njëherë nuk duan të kthehen më. Dhe shkak për këtë janë patjetër ujërat e ndotura, pirgu i mbeturinave dhe çmimet e kripura.
Për ndotjen e detit të Vlorës ka reaguar edhe ish-Sekretari i Përgjithshëm i Ministrisë së Bujqësisë, Vojo Bregu. Ai shkruan në një reagim në Facebook se si rrallëherë deti në Drymades është pis me ujra të zeza.
Bregu tregon se, nga një bisedë me një fshtatar të zonës, mësoi se resortet në këtë zonë si dhe beach bar-et kanë gropa septike dhe pronarët nuk kanë çfarë të bëjnë kur ato tejmbushen dhe i derdhin në det.
Vojo Bregu shprehet se task forca e ka të thjeshtë ta vërtetojë dhe parandalojë këtë katastrofë dhe krim mjedisor, gjithmonë nëse do.
“Si rrallëherë deti në Drymades është pis me ujra të zeza. Pas një bisede me një fshatar të zonës, ai më tha që resortet në këtë zonë si dhe beach bar-et kanë gropa septike. Të shtunë dhe të dielë, zona është e tejmbushur dhe si pasojë dhe gropat septike. Personi më tha që kur mbushen gropat, pronarët nuk kanë se çfarë të bëjnë dhe i derdhin në det, përgjithësisht të dielën në darkë dhe në vazhdim, për ti pasur bosh në fundjavë. Task forca, gjithmonë nëse do, e ka të thjeshtë ta vërtetojë dhe parandalojë këtë katastrofë dhe krim mjedisor.”– shkruan Vojo Bregu.
Ndotja e detit nga Saranda e deri në Velipojë ka shqetësuar pushuesit dhe denoncimet në media e rrjete sociale nuk kanë qenë të pakta.
Vetëm pak ditë më parë, disa pushues të Himarës, denoncuan se deti po qelbej nga fekalet e shkarkimeve të anijeve. Ky është një fenomen që ndodh shpeshherë në vendin tonë, por askush nuk mban përgjegjësi si gjithmonë.
Siç edhe shihet, restorantet, beach bar-et dhe anijet i shkarkojnë ujërat e zeza në det haptazi pasi nuk i frikësohen askujt! Kush do ti kontrollojë e ndëshkojë fundja?!
Ndërkohë, për shqiptarët që mund të infektohen nga ujërat e ndotura le të kujdesen mjekët e korruptuar të spitaleve tona!
Pamjet e mëposhtme vijnë nga Borshi:
