UEFA ka bërë publik sot atë që ekspertë te saj teknik mbi turneun, e kanë cilësuar si formacionin ideal të Euro 2024.
Një formacion ku sigurisht kishte një dominim nga pjesëtarët e Spanjës që u shpall kampione, por edhe me disa surpriza që kanë lënë gojëhapur tifozët dhe kanë sjellë revoltë në rrjetet sociale.
Polemika e parë ka të bëjë me portën, ku UEFA kishte zgjedhur Maignan edhe pse për shumëkënd ishte Mamardashvili portieri më i mirë, ose edhe Pickford që bëri pritje vendimtare gjatë gjithë turneut për Anglinë.
Në mbrojtje, Saliba dhe Akanji janë në qendër, me Cucurellan majtas dhe me Walker djathtas.
Pikërisht zgjedhja e këtij të fundit në formacion ka lënë të çuditur shumëkënd, pasi mbrojtësi i djathtë anglez ishte nën rendimentin e tij në këtë turne, si dhe cilësohet fajtor te të dy golat që pësoi Anglia në finalen ndaj Spanjës.
Kjo bëri që rrjetet sociale të UEFA-s pas publikimit të lajmit të mbusheshin me komente të tifozëve kundër këtij vendimi për Walker duke filluar nga “Çfarë do ky këtu?” për të vazhduar me kërkesat për shkarkim të “ekspertëve” që kishin bërë këtë zgjedhje.
