Në seancën e sotme ndaj Fatmir Mediut lidhur me çështjen “Gërdeci” ka pasur debate dhe përplasje mes avokatëve të ish-ministrit të Mbrojtjes dhe gjyqtares së GJKKO, Irena Gjoka.
Debatet agravuan deri në pikën që Gjoka urdhëroi përjashtimin e një prej dy avokatëve të Mediut, Ardian Visha për të dalë nga salla.
E gjitha nisi me marrjen në pyetje të 5 ekspertëve: Bexhed Zeqiri, Ymer Stafa, Rasim Metallari, Latif Cela, Mondi Hoxha, të cilët kanë përcaktuar dëmin ekonomik të shkaktuar nga shpërthimi i 15 marsit 2008.
Gjatë seancës gjyqësore që po zhvillohet në GJKKO, ish-ministri i Mbrojtjes Fatmir Mediu ka pyetur ekspertët se cila është përgjegjësia e tij. Pyetje kanë bërë edhe avokatët e Mediut, Henrik Ligori dhe Ardian Visha, por ky i fundit ka pasur edhe përplasje me gjyqtaren Irena Gjoka.
Në një moment debati është zhvilluar edhe mes prokurorit të SPAK, Arben Kraja dhe avokatit Ardian Visha. Ish-drejtuesi i SPAK i kërkoi avokatit që të mos bëjë ngritje provokuese. Pavarësisht paralajmërimeve, avokati vazhdoi me pyetjet, derisa Gjoka e përjashtoi nga salla.
Në fjalën e tij të fundit, avokati iu drejtua gjyqtares me fjalinë: “Vazhdo me telekomandimin!”.
