Egnatia i ka dhënë fund sot ndeshjeve miqësore në Slloveni, me një sfidë përgatitore kundër ekipit malazez të Buduçnost.
Skuadra e drejtuar nga Edlir Tetova kishte barazuar me shifrat 2-2 ndaj Ruzhomberok dhe Mariborit në dy ndeshjet e mëparshme, por sot ka pësuar humbjen e parë të fazës përgatitore me rezultatin 2-1.
Përballë skuadrës malazeze, ka qenë i rikthyeri Redi Kasa ai që është bërë protagonist në fundin e pjesës së parë, duke gjetur golin e avantazhit për ekipin rrogozhinas. Por malazezët kanë barazuar rezultatin para fundit të pjesës së parë dhe më pas në fund të ndeshjes, kanë gjetur edhe golin e fitores 2-1.
Tanimë Egnatia do të kthehet në Shqipëri për t’u përgatitur këtu për ndeshjet e Ligës së Kampioneve ndaj Borac të Bosnjë Hercegovinës. Ndeshja e parë e skuadrës rrogozhinase është në transfertë, ndërsa do të luajë të dytën më pas në fushën e saj.
