Ronald Koeman, trajneri i Holandës, shpreh keqardhje për vendimin e arbitrit që e anuloi golin e Xavi Simons për pozicion jashtë loje të Dumfries dhe deklaroi se portieri i Francës, Mike Maignan, nuk është shqetësuar nga mbrojtësi holandez, në rrugën e topit.
“Po, është e vështirë, ai gol i anuluar. Nuk mendoj se Denzel e shqetësoi portierin. Portieri i tyre sapo mbërriti shumë vonë, kur topi kishte përfunduar në rrjetë. Në fakt, atyre iu deshën pesë minuta për të vendosur. Iu desh kaq shumë kohë, sepse nuk e dinin”, tha trajneri i skuadrës holandeze.
Për Koeman, rezultati ishte “pak zhgënjyes” dhe ai u mërzit për disa gabime të lojtarëve të tij, të cilët, sipas tij, herë pas here humbën posedimin e topit kur duhej ta mbanin atë. “Kjo nuk ishte e mirë. Kishte shumë hapësirë midis linjave tona dhe ne mund të kishim bërë më mirë në pjesën e dytë,”- tha ai.
“Është gjithmonë e vështirë të përballesh me një ekip si Franca. Ne duam të luajmë stilin tonë të futbollit dhe të jemi të guximshëm, por nuk mund ta humbim topin si sonte. Ne duhet të jemi më të shpejtë në mënyrën se si luajmë. Ne reagojmë dhe krijojmë më shumë mundësi përpara. Ne jemi një ekip që ende duhet të rritet.”
Së fundi, Koeman deklaroi se nuk e ndjen rezultatin si “fitore” sepse skuadra e tij është në Eurokupë për të fituar e për të shënuar gola: “Nuk patëm aq shumë mundësi, por imagjinoj se Franca është relativisht e kënaqur me rezultatin, ashtu si ne”, përfundoi ai.
