Erion Hoxhallari nis një tjetër aventurë jashtë Shqipërisë. Ish-kapiteni i Tiranës, pasi nuk rinovoi kontratën e tij me bardheblutë duke u larguar nga kjo skuadër, ka nisur një aventurë të re jashtë kampionatit shqiptar.
Mbrojtësi i majtë, ka firmosur për dy vite me klubin e Polonia Varshavës, në kategorinë e dytë polake, duke vazhduar atje karrierën e tij. Hoxhallari kishte qenë në bisedime me klube të tjera të Superiores por edhe në vendet e rajonit, por në fund ka nënshkruar me këtë klub, i cili ka ambicie që së shpejt të kthehet në elitë.
Polonia Varshavë ka qenë një ndër klubet me traditë në futbollin e këtij vendi, por në vitet e fundit për shkak të problemeve financiare, ra deri në kategorinë e katërt.
Tani klubi i cili ka një rivalitet të ndezur me Legia Varshavën, është ngjitur në kategorinë e dytë dhe kërkon të vazhdojë rritjen graduale për t’u kthyer në elitë, ku është shpallur dy herë kampion në historinë e tij.
