Besimtarët myslimanë festojnë sot një nga 2 festat më të rëndësishme, Kurban Bajramin, teksa nuk kanë munguar as urimet e politikanëve.
Presidenti i Republikës, Bajram Begaj me anë të një postimi në rrjetet sociale, shkruan se “Kurban Bajrami është akt arsyeje dhe vullneti, me anë të të cilit ne kuptojmë madhështinë e mesazhit hyjnor dhe përpiqemi të përmbushim rolin tonë për të bërë të mira e për t’iu gjendur pranë atyre që nuk kanë mundësi”.
Vetëm ky reflektim i gjithsecilit- shkruan presidenti Begaj- bën të mundur një shoqëri më të mirë e më të drejtë.
“Përzemërsisht i uroj Kurban Bajramin besimtarëve myslimane shqiptarë!
Kurban Bajrami bart mesazhin e sakrificës sublime duke mundur egoizmin, zemërimin dhe lakminë.
Kurban Bajrami është akt arsyeje dhe vullneti, me anë të të cilit ne kuptojmë madhështinë e mesazhit hyjnor dhe përpiqemi të përmbushim rolin tonë për të bërë të mira e për t’iu gjendur pranë atyre që nuk kanë mundësi.
Vetëm ky reflektim i gjithsecilit bën të mundur një shoqëri më të mirë e më të drejtë.
Gëzuar për shumë vjet Kurban Bajramin”, shkruan Begaj.
Po ashtu edhe kryeministri Edi Rama ka uruar shqiptarët për Kurban Bajramin.
Rama ka shpërndarë një foto të veçantë, në këtë ditë të veçantë për besimtarët myslimanë.
“GËZUAR KURBAN BAJRAMIN☀️”, shkruan Rama.
Edhe kryedemokrati Sali Berisha ka uruar të gjithë besimtarët myslimanë në Shqipëri për Kurban Bajram. Berisha, në mesazhin e tij thotë se uron që Bajrami që vjen të gjejë më mirë të gjithë shqiptarët.
“Gëzuar Kurban Bajramin!
Të dashur miq, sot muslimanët shqiptarë në Shqipëri dhe kudo që janë festojnë Kurban Bajramin, ditën e mëshirimit, durimit, përkushtimit dhe sakrificës të njeriut për Krijuesin, veten, familjen, vendin e tij.
Le t’i urojmë ne së bashku nga zemra të dashur miq, çdo besimtari musliman si dhe mbarë shqiptarëve, Gëzuar këtë ditë të shenjtë dhe t’i lutemi Zotit të pranojë dhe shpërblejë me të mirat e tij çdo durim, sakrificë e përpjekje të çdo shqiptari. Bajrami që vjen më mirë të na gjej! #sb”, shkruan Berisha.
Gjithashtu edhe Presidenti i PL-së Ilir Meta ka uruar të gjithë besimtarët myslimanë për festën e Kurban Bajramit.
Meta ka uruar këtë festë të shenjtë nga qyteti i Kavajës.
