Një 47-vjeçare është proceduar penalisht nga Policia, pasi dyshohet se tentoi të fuste në Shqipëri përmes aeroportit të Rinasit rreth 36 mijë paund pa i deklaruar.
Lajmin e ka bërë të ditur Policia përmes një njoftimi, ku thuhet se shuma e parave është sekuestruar në cilësinë e provës materiale.
Paratë sipas Policisë u gjetën në çantën e 47-vjeçares, ndërkohë materialet i kaluan Prokurorisë për veprime të mëtejshme proceduriale.
Njoftimi i Policisë:
Rinas-Tentoi të fuste në Shqipëri, rreth 36 000 paunde, pa i deklaruar, procedohet penalisht 47-vjeçarja.
Sekuestrohet shuma e parave.
Si rezultat i rritjes së vigjilencës së shërbimeve të Policisë Kufitare, me qëllim parandalimin dhe goditjen e krimeve në kufi, në PKK Rinas, në hyrje të Shqipërisë, u krye kontroll në çantën e shtetases L. B. (me shtetësi shqiptare dhe angleze), ku u gjetën rreth 36 000 paunde, të cilat ajo nuk i kishte deklaruar konform ligjit.
Në vijim të veprimeve procedurale për rastin, u referuan materialet në Prokurori, ku nisi procedimi në gjendje të lirë, për veprën penale “Mosdeklarimi në kufi i të hollave dhe i sendeve me vlerë”, për shtetasen L. B., 47 vjeçe. Gjithashtu, u sekuestrua në cilësinë e provës materiale, shuma e paundeve.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
