Deputeti i PD-së, Lulzim Basha me shumë mundësi nuk do të bëjë rekurs në Gjykatën e Lartë, për të ankimuar vendimin e dhënë ditën e sotme nga Gjykata e Apelit, e cila i dha vulën e Partisë Demokratike Sali Berishës.
Këtë gjë e bëri me dije Sekretari për Çështjet Ligjore në grupimin e tij, Indrit Sefa. I ftuar në emisionin “Top Story, Sefa tha se vazhdimi i kësaj beteje të lodhshme është në dëm të demokratëve. Sipas tij, ata nuk janë ndarë për çështje vule, por vizioni
“Tejzagjtja e këtij procesi gjyqësor ndikonte te demokratët, ishte lodhje e tejskajshme. Ne e kemi kërkuar gjithmonë një zgjidhje. Kemi kërkuar që të gjitha palët të respektojnë vendimin e gjykatës. Ne e marrim të mirëqenë që sot PD është ajo që u vendos. Mendoj se kjo betejë ka zgjatur dhe nuk besoj se do të ishte në të mirë të demokratëve, vazhdimi i betejës. Ne jemi ndarë në çështje vizioni, jo vule. Unë personalisht, nuk kam të njëjtin vizion si Sali Berisha. Është një parti që drejtohet në mënyrë vertikale, pa vizion, nuk ka ide, nuk ka shpresë. Po nuk u reformove vetë, nuk ke çfarë pretendon nga qytetarët shqiptarë” – tha Indrit Sefa.
Juristi, megjithatë, nuk kurseu një rezervë për vendimin e sotëm të dhënë nga Gjykata e Apelit.
“Në opinionin tim ligjor, jam i zhgënjyer. Mendoj se gjykata pati një nxitim për të dhënë një vendim. Ishin 56 faqe, gjykata u tërhoq për vendim për 48 min. megjithatë, nuk jam mësuar të komentoj vendimin e gjykatave” – tha Sefa.
