Avokati Sokol Mëngjesi u dhunua brutalisht nga 4 persona mëngjesin e sotëm në zonën e ish-Bllokut në Tiranë. Policia tha se ka identifikuar 4 agresorët, 1 nga të cilët është vetëdorëzuar ndërsa për 3 të tjerët në kërkim policia ofron 20 mijë euro shpërblim për çdo informacion të vlefshëm.
Organizatori i këtij sulmi ishte Dritan Nano, një prej 8 trashëgimtarëve të një prone që përfaqësohej në gjyq nga avokati Sokol Mëngjesi dhe procesi ishte fituar në të dy shkallët e gjyqësorit.
Gazetari Eni Ferhati tregoi në emisionin Now në Euronews Albania se ngjarja ka ardhur pas një konflikti të akumuluar mes palëve, pasi trashëgimtarët, pasi fituan gjyqin nuk pranonin t’i jepnin avokatin përqindjen në pronën e fituar prej tyre, që më parë e kishin pranuar përmes një kontrate.
“Është një ngjarje që është një konflikt i akumuluar prej shumë muajsh. Shtetasi Dritan Nano që është ndaluar me iniciativë nga policia është një nga trashëgimtarët e përmendur në konferencën për shtyp nga drejtori i policisë. Mëngjesi kishte nënshkruar një kontratë me trashëgimtarët e një prone që ata e pretendonin për ta përfaqësuar në të gjitha shkallët e gjyqësorit, që në rast se do të fitojë avokati do përfitojë X për qind të pronës. Bëhet fjalë për një pronë me interes të lartë në një zonë të lakmuar pranë Liqenit Artificial ku këta trashëgimtarë do përfitonin dyqane, apartamente dhe në bazë të kontratës avokati do përfitonte X për qind të këtyre pronave. Pasi fitohet i gjithë procesi në të gjitha shkallët, trashëgimtarët nuk bien dakord me kontratën, ka pasur disa takime gjatë muajit të fundit ku trashëgimtarët nuk kanë qenë dakord dhe avokati nuk është tërhequr nga e drejta e tij”, tha gazetari.
