Trajneri i Kombëtares, Sylvinho shpjegoi në konferencë zgjedhjet e bëra për listën e 27 lojtarëve të ftuar për në Kampionatin Europian.
Por në listën paraprake vihen re disa mungesa të rëndësihme në sulm, si Sokol Cikalleshi, Myrto Uzuni apo edhe Arbnor Muja.
Mungesë e rëndësishme në mesfushë është Keidi Bare, ndërsa në mbrojtje mungon Frederik Veseli.
Një nga risitë e publikimit të listës së kombëtares shqiptare, ishte afrimi i Medon Berishës, i cili do të bëjë debutimin e tij.
Në fjalën e tij, tekniku i Shqipërisë u shpreh se ka kohë për eksperimente dhe se nuk mund ti merrte dot të gjithë.
“Jam krenar që erdhi ky moment. Trajneri dhe stafi kanë falënderim të veçantë për ata që kontribuan, kam mirënjohje për të gjithë. Zgjedhjet janë bazuar në proces të gjatë studimi.
Kemi bërë zgjedhjet për të përballur me sukses një fazë finale europiani. Puna në Kombëtare është ndryshe nga klubet. Ne në miqësore i dhamë mundësi disa lojtarëve. Dera e kombëtares është e hapur.
Ne provuam lojtarët që donim, por nuk kemi kohë për eksperimente. Finalet e Europianit kanë specifikë. Jam i bindur se grupi është 100 përqind. Zgjedhja ime është e vështirë, faleminderit të gjithë. Ne do shkojmë në Europian me optizëm.
Shumë befasi në zgjedhjet tuaja, shohim një tkurrje në repartin ofensiv. Pse kjo zgjedhje?
“Ne patëm dy miqësore në muajin mars dhe iu dha mundësia disa lojtarëve për t’u provuar. Por megjithatë, dera e kombëtares tonë është e hapur për të gjithë. Ne bëmë disa testime, pamë disa lojtarë, por koha nuk na premtonte për të bërë eksperimente.
Grupi është 100% i qetë dhe kemi atmosferën e duhur. Janë të gjithë të gatshëm për të shkuar në këtë rrugëtim. E kam të pamundur t’i marrë të gjithë në kompeticion, por ajo që ka rëndësi është se grupi është i qetë dhe i motivuar. Zgjedhjet e trajnerit nuk janë të lehta, por rëndësi ka që lojtarët janë të qetë.
Pse jo Alen Sherri, Bare, Cikalleshi dhe Uzuni?
Përgjigjen e kam dhënë, doja të merrja 35, por unë mund të marr vetëm 26 në fund, në këtë liste kemi 27. Dikush edhe e meriton, por kjo është jeta. Kemi studiuar lojtarët, karakteristikat e tyre dhe të kundërshtarëve dhe në bazë të këtij studimi kemi bërë këto zgjedhje. Mund të ketë 7-8 lojtarë të tjerë që e meritojnë, por mund të marrim vetëm 26. Do të kemi ndeshjet miqësore dhe mund të bëjmë ndonjë ndryshim.
Zgjedhjet e shumta në mbrojtje, frikë nga kundërshtarët?
Sa i përket listës, mendoj se nuk hyn fare frika që kemi marrë shumë mbrojtës. Kemi parë kundërshtarët, të tre janë shumë të fortë. Kemi pesë lojtarë qendrore, por mund të luajnë tre. Ne besojmë shumë te Muci, Bajrami, Seferi, mund të luajnë në disa role. Laçi është një tjetër që mund të bëjë disa role, ky është e ardhja e futbollit. Ne provojmë të bëjmë më të mirën për këtë skuadër për këtë vend. Sa i përket rinovimit, forca jonë, energjia jonë, është përqendruar te ky Evropian.
