Policia e Peqinit në bashkëpunim me Policinë e Elbasanit kanë zbuluar një magazinë në fshatin Fatishe të përshtatur për kultivimin e kanabisit me anë të llambave.
Si rezultat janë arrestuar pronari i magazinës, drejtori i OSHEE në Peqin, si dhe janë proceduar dy punonjës të këtij institucioni.
Më konkretisht, në kuadër të operacionit policor të koduar “Inside” janë vënë në pranga shtetasit Graciano Kosta, 37 vjeç, banues në Peqin, pronari i magazinës, si dhe shtetasi Elvis Maçi, 33 vjeç, banues në Peqin, me detyrë Drejtor i OSHEE, Peqin.
Mbi pronarin e magazinës rëndojnë akuzat për veprat penale “Kultivimi i bimëve narkotike”, “Prodhimi dhe shitja e narkotikëve” dhe “Vjedhja e energjisë elektrike ose e impulseve telefonike”. Ndërsa, drejtori i OSHEE akuzohet për kryerjen e veprave penale “Shpërdorimi i detyrës” dhe “Moskallëzimi i krimit”.
Gjithashtu, Policia bën me dije se ka proceduar penalisht në gjendje të lirë për veprat penale “Shpërdorimi i detyrës” dhe “Moskallëzimi i krimit”, për shtetasin M. P., 60 vjeç, me detyrë elektricist i OSHEE, Peqin, dhe për shtetasin A. K., 33 vjeç, me detyrë faturist i këtij institucioni.
Uniformat blu kanë sekuestruar në cilësinë e provës materiale, pajisje elektrike dhe sende të tjera që shërbinin për të kultivuar bimët narkotike, si dhe një sasi e vogël lënde narkotike kanabis.
Autoritetet bëjnë me dije se vijojnë hetimet për identifikimin e personave të tjerë të implikuar në këtë veprimtari kriminale, si dhe për dokumentmin e plotë ligjor të këtij rasti.
Materialet procedurale i kaluan Prokurorisë së Elbasanit për veprime të mëtejshme
