Prokurori italian Giovanni Battista Ferro ka kërkuar burgim të përjetshëm për 42-vjeçarin Selami Bodi. Ky i fundit në tetor të vitit të kaluar mbyti për shkaqe xhelozie bashkëshorten e tij, Etleva Bodi (Kanolja), 31 vjece, në dhomën e gjumit në shtëpinë e tyre në Savona të Italisë.
“Bodi duhet të shpallet përgjegjës për të gjitha faktet e regjistruara ndaj tij”, tha prokurori Ferro.
Gjatë hetimeve, policia zbuloi bisedat e çiftit falë analizave të celularëve dhe u provua se viktima kishte qenë pre e dhunës edhe në të shkuarën.
“Etleva i kishte dërguar me mesazh Bodit më 3-4 tetor 2023, 3 lidhje në tre video në YouTube në gjuhën shqipe me lutje dhe monologje që fokusoheshin tek “si të jesh burrë i mirë në fenë myslimane, të respektosh gruan e të mos e poshtërosh” dhe për “si ta trajtoni mirë gruan tuaj”.
Prokurori Publik është ndalur në disa mesazhe, në të cilat Etleva ka thënë “Unë do të tregoj atë që kam vuajtur, sepse më ke rrahur vazhdimisht”; “Më dërgove në spital dhe vazhdova të duroja”; “Më mirë të vdisja.”
Sipas asaj që doli në dëshmi gjatë fazës së gjykimit, ai e kishte mbajtur Etlevën larg familjes së saj dhe me radikalizimin islamik nuk i lejonte praktikisht asgjë edhe për sa i përket mënyrës së veshjes (për dy vjet që kishte nuk ishte në gjendje të përdorte celularin e saj).
Pas konkluzioneve të prokurorit Ferro, ndërhynë avokatët mbrojtës të Selami Bodit, të cilët kërkuan rrethana lehtësuese për klientin e tyre.
Ngjarja:
Shqiptari, i besimit mysliman, përshkruhet nga mediat italiane si një person radikal për shkak të besimit të tij. Një vizitor i rregullt në xhaminë e Savonës, ai kishte ndikuar që edhe familja e tij të ndiqte rregullat e fesë.
Bashkëshortja e tij Etleva, vishte gjithmonë fustane të gjatë dhe në shumë raste mbulonte edhe kokën me shami.
31-vjeçarja e cila ishte shtëpiake, dilte vetëm me të dhe me katër fëmijët e saj, për të cilët kujdesej çdo ditë. Edhe përdorimi i celularit për të ndjerën pas një kohe të caktuar ishte i ndaluar.
Mbrëmjen në të cilën ndodhi krimi, Selami Bodi dhe gruaja e tij kishin debatuar. Pas zënkës me tyre për arsye xhelozie bashkëshortja ishte mbyllur në dhomë për të bërë një telefonatë e cila ka shqetësuar aq shumë autorin sa e ka mbytur duke i vendosur duart në qafë.
Ajo u transportua me urgjencë në spital, por nuk mundi dot të mbijetote duke ndërruar jetë 48 orë më pas.
