Policia e Gjirokastrës ka shoqëruar tre persona në lidhje me ngjarjen e rëndë të regjistruar këtë të enjte ku janë gjetur të pajetë çifti i të moshuarve Kosta Ilia 84 vjeç dhe Kleoniqi Ilia 88 vjeçe në fshatin Bodrishtë të Dropullit.
Bëhet fjalë për dy banorë të këtij fshati dhe një bari. Shoqërimi i tyre është bërë në cilësinë e personave që mund të kenë dijeni për krimin.
Edhe pse dera e banesës u gjet e mbyllur, Policia e Gjirokastrës ende nuk e kapërjashtuar plotësisht pistën se dy të moshuarit mund të jenë vrarë nga persona të tjerë. Një tjetër pistë është dhe ajo se dy të moshuarit janë konfliktuar me njëri-tjetrin dhe mund të kenë goditur njëri-tjetrin me sende të forta.
Trupat e pajetë të çiftit të të moshuarve, Kosta dhe Kleoniqi Ilia u gjetën nga një fqinje e tyre, pas një telefonate nga mbesa e 84-vjeçarit nga Athina, e cila kërkonte të dinte mbi fatin e tyre pasi nuk po arrinte të kontaktonte dot me ta.
Fqinja shkoi në banesën e tyre dhe gjeti 84-vjeçarin të shtrirë në pragun e shtëpisë pranë tryezës me një shenjë goditje në pjesën anësore të kokës. Ndërsa 88-vjeçarja qëndronte e pajetë në brendësi të dhomës, me shenja dhunë në trup.
