Nga Boldnews
Prej shumë kohësh përflitet se Ëngjëll Agaçi, Sekretari i Përgjithshëm i Kryeministrit Edi Rama, është personi që kontrollon në hije drejtësinë, sidomos atë të krijuar pas Reformës në Drejtësi, përfshirë edhe procesin e Vetingut.
Thuhet gjithashtu se është ai që përzgjedh titullarët e këtyre institucioneve, i orienton dhe drejton në vendimmarrje, kur ka interesa të qeverisë apo personale të Edi Ramës.
Një video e publikuar mbrëmjen e së Hënës në “Çim Peka Live” në “Syri Televizion” dëshmon se zërat që thonë se “Agaçi kontroll drejtësinë” nuk janë thjesht një legjendë urbane.
Në nëntor të vitit 2023, në ambasadën italiane në Tiranë zhvillohet një ceremoni për dekorimin nga presidenti italian, Sergio Matarela, me urdhërin “Kalorësi i Meritës”, të Agaçit, ish-avokat në Itali dhe tashmë “eminenca gri” e Edi Ramës.
Në pamjet e publikuara dallohet se në ceremoni marrin pjesë disa prej eksponentëve më të lartë të sistemit të drejtësisë në Shqipëri. Të gjithë duken të lumtur për dekorimin e Ëngjëll Agaçit.
Ardian Dvorani, “kalorësi anti-korrupsion” që nuk ka shënuar asnjë rast gjykimi të suksesshëm kundër korrupsionit, gjendej në atë takim dhe dukej shumë i kënaqur me rezultatet e Agaçit.
Dvorani “ka lindur për shef” në epokën e Rilindjes së Edi Ramës. Ai ka mbajtur postin e kryetarit në detyrë të Gjykatës së Lartë, megjithëse duhet të ishte larguar nga detyra, pasi kishte harruar 100 milionë lekë gjatë procesit të Vetingut.
Me kryesimin e Gjykatës së Lartë, Dvorani drejtoi për disa kohë edhe Këshillin e Emërimeve në Drejtësi, duke vendosur vendin në kolaps institucional, pasi synonte të emëronte gjyqtarët pranë Edi Ramës për në Gjykatën Kushtetuese. Tashmë, Dvorani drejton prej gati një viti Gjykatën Administrave të Apelit.
Në të njëjtën ceremoni gjendet edhe Ina Rama, ish-prokurore e Përgjithshme, tashmë gjyqtare në Kolegjin e Posaçëm të Apelimit. Prej vitesh, Ina Rama është akuzuar nga opozita e djathtë se është një “militante e Edi Ramës”. Edhe ajo dukej e lumtur në ceremoninë e dekorimit të Agaçit.
Në takimin festiv për Ëngjëll Agaçin ishte edhe Pamela Qirko, kryetare për tre vjet e Komisionit të Pavarur të Kualifikimit dhe tashmë anëtarë e kësaj strukture që kryen vetingun për gjyqtarët dhe prokurorët. Qirko është gjithashtu motra e zv.kryeministres, Belinda Balluku.
Gjithashtu, në takim shihet i pranishëm edhe kreu i Dhomës Kombëtare të Avokatisë, Maksim Haxhia.
Të gjithë këta duket se përbëjnë “grupin e miqve të ngushtë” të Ëngjëll Agaçit, pasi në ceremoni të tilla, i dekoruari fton ata që i ka më për zemër.
