Pengesë e re për De Jong. Holandezi iu nënshtrua testeve mjekësore mëngjesin e së hënës, të cilat zbuluan se vuan nga një ndrydhje në kyçin e këmbës së djathtë. Ky është lëndimi i tretë i mesfushorit këtë sezon, në të njëjtën zonë.
Barcelona nuk e ka raportuar, si zakonisht, kohën e parashikuar të mungesës së tij, por gjithçka tregon se, në varësi të ashpërsisë dhe duke marrë parasysh se ka mbetur vetëm një muaj garë, holandezi mund t’i ketë thënë lamtumirë sezonit.
Mbetet të shihet evolucioni, gjithsesi, teksa nuk duhet të harrojmë se këtë verë është Europiani dhe mesfushori portokalli nuk ka ndërmend të rrezikojë me kthimin e shpejtë.
“Testet e kryera këtë të hënë kanë konfirmuar se lojtari i ekipit të parë, Frenkie De Jong, ka pësuar një ndrydhje në kyçin e këmbës së djathtë. Ai është jashtë fushave tashmë, evolucioni i dëmtimit të tij do të përcaktojë disponueshmërinë”, – thuhet në deklaratën e Barcelonës.
De Jong duhej të largohej nga fusha pak para fundit të pjesës së parë, pas një përplasjeje këmbë më këmbë me Valverde. Menjëherë u ndezën zilet e alarmit për shkak të gjesteve të lojtarit. U dyshua për ndonjë dëmtim edhe më të madh, pasi u largua nga fusha e lojës me barelë dhe duke mbuluar fytyrën me duar.
Problemi kryesor është lëndimi i tretë i lojtarit në të njëjtën zonë, këtë sezon. Midis shtatorit dhe nëntorit ai humbi 10 ndeshje për shkak të “indesmozës tibioperoneale distale”. Dëmtimi i parafundit, ndrydhje në anën e jashtme të këmbës, një muaj e gjysmë më parë, e detyroi të humbiste 6 ndeshje.
