Kryetari i Komisionit Hetimor Parlamentar për TIMS-in, Ervin Salianji ka reaguar pas braktisjes që deputetët socialistë i bënë mbledhjes.
Salianji shprehet se deputetët janë larguar nga frika e llogaridhënies, ndërsa shton se largimi i tyre tregon dukshëm se kush ka gjëra për të fshehur.
“Ikën si djalli temjanit nga frika se institucionet do të jepnin llogari. Llogarinë do ta jepni një më një sepse ajo vendimmarrje është marrë nga ky komision me vendim të ndërmjetëm. Kërkesat apo ankesat apo qaravitjet që kemi qenë në tualet, kishim temperaturë, kishim sëmurë gjyshen, nuk e kishim mendjen, bëmë ironi nuk hyjnë në punë. Me këtë metodë kanë shkatërruar Shqipërinë.
Kërkesat për informacion drejtuar institucioneve do të depozitohen ashtu sic janë. PS nëse do të bllokojë punën e komisionit hetimor, e dinim që këtë variant do bëjnë, kam përshtypjen që do kthehen me një këmbë, sic ka ndodhur edhe herët e tjera. Hyjnë me mendtë e tyre dhe dalin me mendtë e të tjerëve nga telefonatat. Nuk kërkojnë të diskutojnë në publik, por në vende të tjera. Është e dukshme se kush ka gjera për të fshehur”, tha ai.
