Një aksident tragjik është regjistruar në orët e para të mëngjesit të kësaj të marte, në aksin rrugor Këlcyrë- Përmet.
Një automjet tip “Mercedes Benz” ka dalë nga rruga dhe ka rënë në anë të lumit Vjosë, pasi dyshohet se drejtuesi i saj ka humbur kontrollin mbi drejtimin e mjetit. Si pasojë e aksidentit ka humbur jetën drejtuesi i “Benzi-t” (një shtetas nga Shkodra) dhe 7 klandestinë që ndodheshin në mjet. Ngjarja ka ndodhur rreth orës 04:00, në afërsi të fshatit Kuqar.
Burime bëjnë me dije se drejtuesi i mjetit ka qenë duke transportuar 7 refugjatët e paligjshëm nga pika kufitare e Tre Urave në drejtim të Këlcyrës. Shoferi ka tentuar që t’i ikë policisë, pasi është pikasur nga patrulla me mjetin e mbushur plot me njerëz.
Sapo ka parë patrullën e policisë ai ka shtuar shpejtësinë dhe është kthyer për në drejtim të Përmetit për t’u larguar. Nga ekspertiza paraprake, burime bëjnë me dije se mjeti ka qenë duke lëvizur me shpejtësi 180 km/h. Për shkak të shpejtësisë së lartë, drejtuesi ka humbur kontrollin e ‘Benz’-it dhe ka “fluturuar” në anë të lumit Vjosë.
Të 8 personat që ndoeshin në “Benz” kanë humbur jetën në vendin e ngjarjes, ndërsa ka pasur vështirësi edhe në nxjerrjen e trupave.
Në vendngjarje ndodhet grupi hetimor i cili nën drejtimin e Prokurorit punon për sqarimin e rrethanave dhe shkakut të aksidentit. Gjithashtu në vendngjarje ndodhen dhe Drejtori Vendor i Policisë, Drejtori i Departamentit për Kufirin, Drejtori i Policisë Rrugore dhe Drejtori i Rendit Publik, si dhe dhe dy grupe të Forcës Kombëtare të Sigurisë.
Policia njofton se në përfundim të veprimeve të para do ketë njoftim më të detajuar.
