Po diskutohet këtë të martë në mbledhjen e komisionit parlamentar të Sigurisë Kombëtare ligji “Për Shtetësinë”, i kthyer për rishqyrtim në Kuvend nga ana e mazhorancës.
Ministri i Brendshëm, Taulant Balla, gjatë fjalës së tij tha se është kundër dhënies së provimit për gjuhën shqipe në mënyrë që të përfitojnë shtetësinë shqiptare, për shtetasit e Kosovës dhe Maqedonisë së Veriut dhe diaspora.
Gjithaashtu, Balla tha se është pro dhënies së shtetësisë edhe për ata që nuk i kanë mbushur ende 18 vjeç, pasi u krijohet mundësia talenteve të sportit që kanë lindur e jetojnë jashtë Shqipërisë, që të pajisen me pasaportën shqiptare. Ai tha se duhet pranuar dekreti i presidentit Bajram Begaj por duhen votuar edhe një herë ligjet dhe dekretet.
“Ne do të mundësojmë në rastet e sportistëve që Ministria e Brendshme dhe Presidenca që të japin shtetësinë dhe nën moshën 18 vjeç. Këto i tejkalojnë ndasitë politike, Në këto momente që flasim na dëgjojnë vëllezërit në diasporë, Kosovë, Mal i Zi apo Maqedoni. Ata kanë lindur shqiptarë, flasin gjuhën shqipe, ndaj s’kanë pse të bëjnë provim të gjuhës shqipe. E tejkaloj përtej pozicionit që mbaj. Ligjvënësi e ka dhënë vullnetin e tij. Është shprehur me 96 vota në tërësi dhe nuk gjej dot arsye që disa kolegë deputetë nuk janë shprehur. Sa kohë që edhe nen për nen nuk ka pasur asnjë votë kundër, në praktikën parlamentare, nenet votohen me votim të hapur, ky është një shqetësim i drejtë që ka presidenti i republikës dhe ta pranojmë dekretin. Të votojmë dhe një herë ligjin dhe dekretet. Meqë këtu janë përfaqësues të presidentit të marrim aprovimin që të hyjë për miratim ditën e enjte.”, tha Balla.
