Pas arrestimit për shpërdorim detyre, Jorgo Goro jep dorëheqjen nga detyra e kryetarit të Bashkisë së Himarës.
Fizikisht në qeli, dorëheqjen e ka njoftuar me një letër drejtuar Këshillit Bashkiak Himarë, ndërsa ka vënë në dijeni dhe Prefektin e Qarkut të Vlorës.
Në letër, Goro hedh akuza ndaj kundërshtarit të tij politik në zgjedhjet lokale të 14 majit 2023, Fredi Belerit, i cili e mundi edhe pse pas hekurave.
Ai ndalet edhe të akuzat e ngritura ndaj tij nga Prokuroria e Posaçme, ndërsa vetëcilësohet i pafajshëm.
“Nga fundjava që sapo kaloi jam në një situatë absurde me drejtësinë për një faj që nuk e kam bërë. Akuzohem për ‘shpërdorim detyre në bashkëpunim’ me zyrtarë në Vlorë që s’kam asnjë lidhje dhe për ‘falsifikim’ dokumentash që tek kryetari i bashkisë kalojnë vetëm për firmë. Por ky është një absurditet me të cilin do më duhet të përballem para gjykatës me faktet e mia dhe të drejtën që e kam me ligj e me moral”, shkruan Goro.
“Prandaj duke i falenderuar me shpirt të gjithë himariotët (më kanë votuar apo s’më kanë votuar, ky falenderim nuk i ndan), për të gjithë nderin e madh që më bënë në këto vite, dorëhiqem nga detyra me kokën lart dhe zemrën plot me mirënjohje të përulur. Natyrisht e doja të ishte ndryshe largimi im dhe jo me një letër nga një qeli paraburgimi, po jeta kjo është nuk i kemi dot në dorë t’i zgjedhim të këqiat që na gjejnë”, shton.
Goro mbeti në detyrën e kryebashkiakut të Himarës edhe pas humbjes në zgjedhje për shkak të arrestimit Fredi Beleri, i cili edhe pse doli fitues më 14 Maj, nuk arriti të betohej si kryetari i ri i bashkisë, pasi gjykatat i refuzuan lejen.
Arrestimi dhe mbajtja në qeli e Belerit shkaktoi përplasje diplomatike mes Tiranës e Athinës zyrtare. Vetë Beleri i cilësoi akuzat ndaj tij të paqena dhe akuzoi kryeministrin Edi Rama se po ushtronte pushtetin e tij për të mbajtur në qeli, në mënyrë që të vijonte të kishte kontrollin mbi pronat në Himarë.
Të shtunën e kaluar, Goro u vu në pranga bazuar në një vendim të Gjykatës së Posaçme, që caktoi ndaj tij masën e arrestit në burg, duke pranuar kërkesën e SPAK.
Një ditë më parë, GJKKO la në fuqi masën e sigurisë “arrest në burg”. Jorgo Goro akuzohet për veprën penale “Shpërdorimi i detyrës”, kryer në bashkëpunim, në dy raste. Një nga rastet që prokuroria ka gjetur shkelje në ushtrimin e detyrës, është toka prej 5512 m2 e sekuestruar më herët me urdhër të SPAK, që është përdorur nga bashkëshorti i ish-ministres Olta Xhaçka ka për të përfituar statusin e investitorit strategjik. Në këtë rast, sipas akuzës, Goro ka shpërdoruar detyrën duke mos verifikuar dokumentet e tokës, që është tjetërsuar nga tokë shtet, në favor të një tjetër personi me dokumenta false dhe më pas është shitur te biznesi i Artan Gaçit.
Akuza penale u ngritën edhe ndaj disa zyrtarëve dhe ish-zyrtarëve lokalë si dhe personit i cili sipas hetimeve përfitoi me letra false tokën e cila u shit më pas te biznesi i bashkëshortit të Olta Xhaçkës. Megjithatë, ndaj Artan Gaçit, i cili e përdori pronën për të përfituar statusin e investitorit strategjik, prokuroria s’ka gjetur përgjegjësi penale, deri në këtë fazë të hetimeve. Ky fakt si dhe akuza ndaj Goros vetëm për shpërdorim detyre ka ngritur dyshime në opinionin publik se prangosja e Goros ishte një strategji politike e Ramës për të zbutur gjakrat me Greqinë, duke e përdorur kryebashkiakun në detyrë si kokë turku.
***
Letra e Jorgo Goros
Drejtuar:
Këshillit Bashkiak Himarë
Për dijeni:
Prefektit të Qarkut të Vlorës
Të nderuar,
Ishte një nder i madh dhe motivim i veçantë t’i shërbeja qytetit tim për 12 vite e 10 muaj si qytetari i parë falë votës së himariotëve të mi. Kandidova për të fituar dhe megjithëse humba mbeta këto kohë lidhur në detyrë me legjitimitet të cunguar formal dhe moral.
Rezultati tepër i ngushtë me 19 vota diferencë nuk ishte në favorin tim, po as zhvillimet negative pas zgjedhjeve nuk ishin as në dëshirën as në dorën time. S’mund ta lija detyrën se s’kishte kush ta merrte dhe largimi im vetëm do të shtonte konfuzionin kur Himara u kthye në mollën e një konflikti politik absurd në nivelet më të larta mes dy shteteve.
Megjithëse e dija se sa shumë ishin lidhur fijet e manipulimit propagandistik për gjoja shpëtimin e pronave të Himarës me fijet e manipulimit elektoral për të mbushur autobuzët me premtime dhe xhepat e pasagjerëve elektoralë me para, nuk e prisja atë rezultat. Por nuk kisha as si të flisja dhe t’i hidhja benzinë një zjarri përçarjeje që përfshiu mediat e Athinës dhe Tiranës dhe arriti deri në Bruksel. Një organizatë anadollake e minoritetit fatkeqësisht bindi një shtet të BE-së se po lufton gjoja për të drejtat e njeriut në Himarë. Po në fakt ajo organizatë orkestrohet nga njerëz të paditur, pa skrupuj dhe pa ideale. Përveç parasë dhe rakisë! Marifetçinj të babëzitur që kush i njeh e di për kë dhe për çfarë flas. Tamam një çetë nga ato të kohërave të errëta që mbahet për forcë politike. Vetëm sherrin i ka parë dhe do t’i shohë Himara dhe minoriteti grek në tërësi për sa kohë nuk do t’u bjerë maska edhe në Athinë.
Himara është shumë e vogël për t’u bërë mollë sherri mes dy vendeve fqinje. Ndërsa pretendimet e mia për batërdinë që u bë me lloj-lloj marifetesh, listat e asistencave dhe bursave matanë kufirit, kërcënimet me heqjen e letrave të qëndrimit andej për të sjellë votues që kishin ikur nga Himara fëmijë dhe s’kishin shkelur më, pagesat me listë për blerje votash, nuk kishin më asnjë kuptim mbas arrestimit në flagrancë të “fitimtarit”. I dhashë dorën sa mbaroi numërimi dhe e mbylla kapitullin tim bashkë me gojën.
Por di të them se zullumi i asaj “fitoreje” me më pak se 20 vota ishte shumë më i madh se sa duket nga ato që dëgjohen në media për hetimin. E vetmja gjë që dua sot është që Himara të vazhdojë punën e nisur dhe fqinjësia e vjetër tradicionale mes dy shtetesh të mos bëhet pengu i ca spekullantëve lokalë të maskuar si viktima të një padrejtësie të re shtetërore që nuk ekziston për pronat e himariotëve. Një marrëzi qesharake dhe e rrezikshme e ngritur si kurth ndërshtetëror nga këta spekullantë të djallëzuar.
Himara sot ka statusin e transformimit total të saj, ku prona dikur e destinuar për të provokuar deri edhe tragjedi familjare vlen shumëfish më shumë. Ku çdo banor ka shërbime në mjekësi, shikon investime të konsiderueshme dhe të vazhdueshme në arsim, infrastrukturë, energji elektrike, ujë i pijshëm, etj. Dhe për të shkuar tek turizmi, Himara dikur vetëm me shqiptarë nga vendi dhe Kosova sot kampione e frekuentimit masiv të miliona turistëve nga mbarë bota. Jo në hotele dhe rezidenca të ndërtuara mbi prona të grabitura nga shteti për “oligarkët” siç bërtasin spekullantët anadollakë të lokalitetit, po në troje të kontraktuara me çmime apo kushte gjithnjë dhe më të favorshme nga cilado familje himariote që ka dëshiruar t’i japë të vetat për zhvillim.
Po ndërkohë nga fundjava që sapo kaloi jam në një situatë absurde me drejtësinë për një faj që nuk e kam bërë. Akuzohem për “shpërdorim detyre në bashkëpunim” me zyrtarë në Vlorë që s’kam asnjë lidhje dhe për “falsifikim” dokumentash që tek kryetari i bashkisë kalojnë vetëm për firmë. Por ky është një absurditet me të cilin do më duhet të përballem para gjykatës me faktet e mia dhe të drejtën që e kam me ligj e me moral.
Prandaj duke i falenderuar me shpirt të gjithë himariotët (më kanë votuar apo s’më kanë votuar, ky falenderim nuk i ndan), për të gjithë nderin e madh që më bënë në këto vite, dorëhiqem nga detyra me kokën lart dhe zemrën plot me mirënjohje të përulur. Natyrisht e doja të ishte ndryshe largimi im dhe jo me një letër nga një qeli paraburgimi, po jeta kjo është nuk i kemi dot në dorë t’i zgjedhim të këqiat që na gjejnë!
Me shumë respekt,
Jorgo Goro
