Janë zbardhur detaje të reja nga shpërthimi me tritol i regjistruar në orët e para të mëngjesit të djeshëm tek porta e oborrit të banesës së shtetases Frida Sala, 62 vjeçe, në Shkodër.
Burime pranë grupit hetimor bëjnë me dije se pista kryesore ku po hetohet është aktiviteti i djalit të vogël të 62-vjeçares, Dori Sala. Ky i fundit ka deklaruar para grupit hetimor se nuk ka konflikte me askënd dhe se punon në një kompani interneti.
Por, Policia e Shkodrës ka dyshime se Dori Sala është i përfshirë në një kompani bastesh sportive online, ku dyshohet se është menaxheri i serverave të internetit të kompanisë.
Sipas hetimeve, vendosja e tritolit në derën e banesës dyshohet të ketë qenë një paralajmërim që ai të mos merret më me këtë aktivitet.
Ngjarja ka ndodhur rreth orës 03:40 të së hënës, në lagjen “Tom Kola”, pranë Shkollës Pyjore. Në momentin kur është hedhur ekspozivi brenda banesës ka qenë 62-vjeçarja së bashku me djalin dhe bashkëshortin.
Në dëshminë e dhënë para grupit hetimor, pronarja e banesës Frida Sala ka deklaruar se kur ndodhi shpërthimi ishin zgjuar dhe po bëheshin gati për të ngrënë vaktin e syfyrit duke qenë se agjërojnë në këtë muaj të shenjtë të Ramazanit.
Nga shpërthimi ka pasur vetëm dëme materiale ku është shkatërruar porta kryesore, dera e banesës, muret dhe dritaret janë thyer dhe një automjet që ndodhej i parkuar është dëmtuar.
62-vjeçarja Frida Sala punon në pikën kufitare të Hanit të Hotit, ku peshon mallrat që hynë e dalin në doganë. Në dëshminë e dhënë ajo ka deklaruar se nuk ka konflikte me askënd. Gjithsesi, burime pranë grupit hetimor bëjnë me dije se Frida Sala del në pension për pak muaj dhe policia për momentin nuk e lidh ngjarjen me punën e saj.
Policia ende nuk e ka identifikuar autorin, i cili i filmuar nga kamerat e sigurisë ishte me motor dhe skafandër në kokë.
