Bashkinë e Himarës është një rast i pazakontë ku të dy kryetarët e saj, si ai i zgjedhuri në 14 Maj Fredi Beleri, po ashtu edhe kryetari në detyrë Jorgo Goro ndodhen në burg.
Ky i fundit u arrestua më 23 Mars, pasi akuzohet se në bashkëpunim me vartës dhe zyrtarë të Kadastrës, nëpërmjet dokumenteve të falsifikuara kanë mundësuar kalimin e sipërfaqeve të konsiderueshme tokë shtet në Himarë, në favor të privatëve, pasuri që aktualisht janë në zotërim të një shoqërie të zotëruar nga Artan Gaçi, bashkëshorti i ish-ministres Olta Xhaçka, i cili ka fituar statusin e investitorit strategjik.
Pas këtij ngërçi të krijuar në Bashkinë e Himarës, drejtimin pritet ta marrë një prej nënkryetarëve të bashkisë.
Këshilli Bashkiak pritet të mblidhet së shpejti dhe të vendosë me votë se cili prej dy nënkryetarëve, Blerina Bala apo Pervin Gjikuria do të drejtojë bashkinë Himarë deri në zgjedhjet e reja.
Socialistët kanë shumicën në këshillin bashkiak të Himarës, 13 vota kundrejt 8 të opozitës dhe burime bëjnë me dije po ashtu se Blerina Bala është pretendentja kryesore për të drejtuar përkohësisht bashkinë deri në zgjidhjen përfundimtare të ngërçit.
Mbledhja e Këshillit bashkiak pritet të jetë më 29 mars.
