Albana Fico, e cila mbante postin e drejtoreshës së Qendrës Spitalore Universitare Nënë Tereza (QSUT), është larguar nga detyra. Mësohet se ky post tashmë i është besuar Alma Camit.
Alma Cami aktualisht është shefe e Shërbimit në Reanimacionin e spitalit “Shefqet Ndroqi”.
Deri më tani nuk dihet ende arsyeja e largimit të Ficos nga posti që e mbante prej 3 vitesh, por kujtojmë se ajo ka qenë e sulmuar nga opozita për tenderat e barnave.
Po ashtu, për zjarrin në urgjencën e QSUT, është nisur një hetim nga Prokuroria e Tiranës, e cila ka regjistruar procedimin penal për veprën penale “Shkatërrimi pronës me zjarr”.
Nga ana e prokurorisë është urdhëruar administrimi i të gjitha provave për të dokumentuar shkakun dhe vlerën e dëmit të shkaktuar, si dhe personat përgjegjës për shkaktimin e dëmit. Me administrimin e akteve proceduriale dhe akteve të ekspertimit do të konkludohet mbi shkakun e rënies së zjarrit dhe vatrës fillestare.
Vlen të thekohet fakti se në muajin Mars të vitit 2023, kryeministri Edi Rama dhe ish-ministrja e Shëndetësisë, Ogerta Menastirliu inaguruan investimin 17 milion euro të rikonstruksionit të QSUT-së, që siç duket miliona euro janë bërë tym dhe hi.
Më herët është raportuar se për shkak të zjarrit tek QSUT, shërbimet jetike mjekësore ende nuk janë futur në funksion, teksa spitali është futur në kolaps.
Kujtojmë po ashtu se maxhoranca socialiste e Komisionit të Shëndetësisë rrëzoi kërkesën e deputetes demokrate Albana Vokshi për të kryer një inspektim parlamentar në urgjencën e QSUT-së pasi ajo u dëmtua nga zjarri i rënë në katin e parë në orët e para të mëngjesit të 11 shkurtit.
LEXO EDHE:
Zjarri te Urgjenca e Re e QSUT, bëhet “tym” investimi 17 milionë euro
