Feta Fetai, futbollisti i talentuar me origjinë nga Shkupi shihet si një nga lojtarët më premtues në Kroaci.
18-vjeçari që luan në rolin e mesfushorit ofensiv më parë ka qenë pjesë e ekipit të moshave të Maqedonisë së Veriut, paraqitje me të cilët ra në sy të Lokomotivës së Zagrebit, duke bërë që kroatët ta transferonin në ekip.
Ai po shkëlqen me skuadrën e Lokomotivës në Kroaci, paraqitje të cilat kanë tërhequr edhe vëmendjen e Alban Bushit.
Trajneri i Shqipërisë U-21 i dërgoi ftesë shqiptarit, duke e ftuar në Kombëtare për ndeshjet e vlefshme për kualifikueset e Euro 2025, ku kuqezinjtë do të përballen me Zvicrën dhe Finlandën.
Së fundmi në një intervistë të dhënë për “ABC News”, i ashtuquajtur si “Modriç” shqiptar, Fetai ka folur për emocionet e tij tani që për herë të parë do të jetë pjesë e Kombëtares shqiptare.
“Është kënaqësia më e madhe të luash për Kombëtaren e Shqipërisë dhe padyshim kënaqësia më e madhe e çdo shqiptari. Ftesë kam patur edhe nga Maqedonia e Veriut U21, interesim ka shfaqur edhe Kroacia, por në fund zgjodha të luaja për Shqipërinë”, është shprehur fillimisht talenti shqiptar.
Mediat kroate dhe vetë Bushi e kanë cilësuar “Modric i ri”.
“Pozicioni im ngjason me atë të Modric, por në fund të fundit, ai është një ‘tjetër klasë’, por jam i mendimit se me punë gjithçka mund të arrihet, nëse ke dëshirë mund të arrish shumë më lart. Deri tani i ngjasoj, pasi pikë të fortë kam pasimin, vizionin e lojës dhe vrapimin”.
Si po i shkon aventura në Ligën e Parë të Kroacisë?
“Gjithçka po shkon shumë mirë. Prej 8 muajsh po luaj në Kroaci. Ka shumë shqiptarë, që më kanë ndihmuar. Një prej tyre është edhe shoku i Kombëtares, Jon Mersinaj. Jam i kënaqur si po shkon dhe shpresoj të shkojë edhe më mirë”.
Fetai bën një parashikim edhe për kombëtaren në Euro 2024.
“Besoj se është një ekip i mirë. Janë lojtarë me emër dhe besoj se do të ketë rezultate të mira dhe shpresoj, që pse jo të kalojnë në fazën me eleminim direkt”.
