Kreu i Autoritetit Rrugor Shqiptar, Evis Berberi u arrestua me urdhër të SPAK në krye të detyrës, pasi akuzohet për korrupsion pasiv dhe pastrim parash. Burime për mediat bëjnë me dije se ai është vënë në pranga rreth orës 19:40 në zyrën e tij.
Ky fakt rrëzon lajmet e publikuara ditën e djeshme në disa media pranë Qeverisë se ai kishte dhënë dorëheqjen nga posti që mbante që prej vitit 2021. Në lajmin e publikuar, vetëm disa orë pas arrestimit të tij, thuhej se ai kishte dhënë dorëheqjen disa ditë më parë edhe pse nuk kishte asnjë komunikatë zyrtare.
Siç duket, kjo ka qenë një “fake news” i nxjerr nga zyrat e propagandës së Qeverisë, me qëllimin që ditën e sotme, kur doli lajmi i arrestimit të Evis Berberit, të paraqitej si një ish-drejtor i Autoritetit Rrugor Shqiptar. Kjo për faktin që ministres së Infrastrukturës dhe Energjitikës, Belinda Ballukut, të binte sadopak përgjegjësia morale.
Por, fakti është krejt e kundërta, ministres Belinda Balluku iu kap për korrupsion një prej zyrtarëve më të lartë dhe një prej bashkëpunëtorëve të saj më të afërt, i cili ka qenë shpesh herë i akuzuar për “rrugët e florinjta” që gjeneronte miliona euro.
Evis Berberi prej vitesh ka qenë shumë pranë ministres Belinda Balluku, si kur ishte drejtues i Prokurimeve në ALBCONTROL në vitet 2013-2019 e më pas edhe Këshilltar pranë Ministrisë së Infrastrukturës dhe Energjetikës apo drejtor i Agjencisë së Efiçencës së Energjisë, deri më Qershor 2021 kur kaloi në krye të Autoritetit Rrugor Shqiptar.
Kreu i ARRSH-së, Evis Berberi është në hetim nga SPAK në lidhje me shitjen e kompanisë së tij “DAAM” në vitin 2018. Dyshohet se bëhet fjalë për një transferim fiktiv të kompanisë me qëllim që Evis Berberi të shmangte konfliktin e interesit, pak para se të emërohej si këshilltar në Ministrinë e Infrastrukturës dhe Energjitikës.
Dyshohet se nëpërmjet kësaj kompanie, Evis Berberi ka përfituar qindra miliona lekë para publike, duke lidhur kontrata me institucionet. Bashkë me Evis Berberin, në pranga u vendosën dhe ish-administratori i kompanisë “DAAM”, Valter Begaj dhe administratori i kompanisë Ervis Lami.
Hetuesit e BKH-së kanë ushtruar kontroll në zyrën e Evis Berberit dhe në banesën e tij, ku i janë sekuestruar para cash, por edhe piktura të shtrenjta me vlera të konsiderueshme. Gjithashtu, i janë sekuestruar dhe një sërë sendesh personale si celularë, laptop, USB, dhe dokumente, që mund të çojnë në zbardhjen e aferave të tjera./Boldnews
