Nga Boldnews.al
Prej disa muajsh, inceneratori i Elbasanit nuk funksionon, duke rrezikuar një tjetër krizë mjedisore buzë lumit “Shkumbin”. Arsyeja është se s’është ndërtuar mirë, ka nevojë për mirëmbajtje dhe pajisje. Brenda një kohe të shkurtër, kompania shtetërore “ECO – ELB” ka bërë disa tendera, me vlerë miliona euro.
Para për mirëmbajtjen, para për pajisje dhe tashmë vijon të bëjë tendera të tjerë. Ditët e fundit, kompania ka shpallur edhe procedurën për ta siguruar! Redaksia e BoldNews.al ka mësuar se impianti është fikur në dhjetor 2023, ndërsa ka punuar vetëm disa muaj.
“Është amortizuar dhe në remont”, deklarojnë zyrtarët shtetërorë që po e administrojnë. Por, si u amortizua brenda disa vitesh? Pavarësisht se ka një hetim SPAK-u për disa zyrtarë, a po hetohet edhe amortizimi dhe mungesa e pajisjeve? Vetëm disa ditë më parë, kompania shpenzoi plot 76 milion lekë për blerje makinerish dhe pajisjesh të tjera për inceneratorin.
Mësohet se tenderët janë kryer për shkak se për një periudhë të gjatë, impianti ka shfaqur defekte në procesin e trajtimit të mbetjeve.
Kompania shtetërore “ECO – ELB” ka hapur ditët e fundit një tender me procedurë “sigurimi i objektit të përpunimit të mbetjeve urbane”, ose me fjalën që qarkullon prej disa vitesh – incenerator.
Mësohet se fondi limit i këtij tenderi është 12,000,000 lekë. Bëhet fjalë për shërbime për siguracion. Procedura e lartpërmendur vjen disa muaj pas tenderit “Shërbim-Menaxhim mbetjesh urbane ne landfill (Makineri te renda)” me një fond limit prej rreth 55 milionë lekësh.
Mjetet kërkohen për një afat kohor prej 12 muajsh, ndërkohë që firma shtetërore ka bërë një kontroll në të gjithë inceneratorin. U kërkua ekskavator me goma, fadromë me goma, kamion, buldozer me zinxhir etj.
Mësohet se firma shtetërore “ECO – ELB” është themeluar në datën 18 nëntor 2021 dhe e trashëgoi inceneratorin nga “Albtech Energy”, e cila kishte një kontratë të dorëzimit me çelësa në dorë të impiantit të djegies së mbetjeve në Elbasan. Por, nëse kontrata ishte me “çelësa në dorë”, përse po shpenzohen miliona euro për makineri dhe për ta siguruar?
Aktualisht, ky Incenerator është nën sekuestro nga SPAK, madje janë dhënë edhe vendime penale për zyrtarët e akuzuar. Aksionerët e inceneratorit janë Bashkia e Elbasanit me 52 % dhe Bashkitë e Cërrikut, Gramshit, Peqinit, Belshit dhe Librazhdit, që kanë secila nga 8%.
