Dymbëdhjetë vite burgim është dënimi i dhënë nga Gjykata e Apelit për ish-punonjësin e SHIK, Hektor Voci, i shpallur fajtor për vrasjen e një efektivi policie në vitin e largët 1997.
Vrasja
Sipas hetimeve, ishte data 10 shkurt e 1997-ës, kur Hektor Voci ka qenë duke udhëtuar për arsye pune në segmentin Tiranë – Fushë-Krujë, me kamion tip “Benz” si pasagjer dhe makina po drejtohej nga B.Xh, edhe ai punonjës i SHIK. Ky i fundit ka parakaluar në mënyrë të gabuar duke automjetin që drejtohej nga A.C., punonjës policie pranë Komisariatit Nr.4, në Tiranë, duke e vënë në rrezik këtë të fundit.
Punonjësi i policisë e ka ndjekur me makinë fugonin dhe e ka ndaluar ata pranë fshatit Tapizë. Ai ka dalë nga automjeti i tij dhe është afruar tek kaminoni ku ndodhej Voci, duke mbajtur në dorë armën e shërbimit.
Hektor Voci e ka qëlluar me automatikun e shërbimit duke e vrarë.
Kalvari i gjyqeve
Që prej asaj kohe, çështja në ngarkim të Vocit ka kaluar përmes një kalvari vendimesh gjyqësore në të tria shkallët e gjyqësorit. I fundit, është ai i Gjykatës së Apelit, dhënë dy ditë më parë.
Apeli vendosi dënimin me 12 vite burgim për Vocin, të cilin e shpalli fajtor për akuzën penale të “Vrasjes me dashje”. Dënimi i mbetur, sipas vendimit, do të kryhet në një burg të sigurisë së zakonshme. Para këtij vendimi, ishte në fuqi një verdikt i gjykatës së Tiranës, që e kishte dënuar Vocin me 18 vite burgim.
Sipas një njoftimi të gjykatës, Hektor Voci rezulton të jetë arrestuar për herë të fundit në Britani disa vite më parë edhe ekstraduar më pas drejt Shqipërisë, ku edhe është burgosur.
