Deputeti socialist Bujar Çela, i cili iu nënshtrua ndërhyrjeve kirurgjikale pasi mbeti i plagosur nga shpërthimi i kapanonit në Lushnjë pasditen e djeshme, ndodhet jashtë rrezikut për jetën tek spitali i Traumës.
Po ashtu, edhe i plagosuri tjetër Sokol Lumi, raportohet se ndodhet në gjendje shëndetësore stabël, ndërsa të plagosurit e tjerë nga shpërthimi ndodhen jashtë rrezikut për jetën.
Ndërkohë, deputeti i PS-së, Fadil Nasufi pas daljes nga spitali i Traumës, ku kishte shkuar për të parë nga afër kolegun e tij, Bujar Çela dha më shumë detaje nga gjëndja shëndetësore e këtij të fundit.
Në një prononcim për mediat, ai tha se dëmtimin kryesor Bujar Çela e ka tek kofsha e djathtë, pasi ciflat e shpërthimit e kanë prekur sistemin arteriar venoz, si dhe në pjesën abdominale. Gjithashtu, ai tha se dputeti socialist ka edhe probleme me dëgjimin për shkak të zhurmës së shpërthimit.
“Fatmirësisht gjëndja shëndetësore është stabilizuar. Duhen përgëzuar stafi ushtarak për ndërhyrjen tepër të specializuar për pastrimin e ciflave që kanë ndodhur nga shpërthim. Dëmtimin kryesor e ka në kofshën e djathtë pasi ciflat e shpërthimit e kanë prekur sistemin arteriar venoz, si dhe në pjesën abdominale. Dëmtime ka dhe një pjesën abdominale ku po vijon pastrimi i ciflave. Ka probleme me dëgjimin për shkak të valës së shpërthimit që ka qenë në terren por gjëndja është e stabilizuar në të gjitha parametrat e saj. Është në sallën e reanimacionit.
Kolegët tanë deputetë e kanë gdhirë natën me lutje për të dhe ata që u plagosën. Do të ketë pastrime të tjera. Është në gjëndjen më optimalen më të mundshme nga ajo llahtari që ndodhi dje. Madje po përpiqej të bënte dhe humor por ne nuk e lejuam të bëjnte më shumë.
A ju tregoi pse kishte shkuar dje, dhe sa larg shpërthimit ishte?
Nuk u futëm farë në këtë çështje. Ishim atje për 1 minutë e gjysmë. Ne na kënaqi se reagoi, dje e vizituam në reanimacion e Lushnjes dhe nuk ishte fare në vetëdije. Edhe pacienti tjetër që ndodhet në Lushnje është stabilizuar. Ka dhe ai cifla të shpërthimit.” tha Fadil Nasufi.
